Isaya 9 - La Bible en Otetela (Bible K'Ekila) 1991

Eutwelu kʼUwandji wa Ki la Diulelu Diandi

¹ Keli okei hawutshikala pundju lu kete yakasuyama wulu. Lu nshi ya ntundu Unyashungu akakumbi kete ya Zebuluna la kete ya Nafetali la sonyi. Keli lu nshi yayayi, ndi ayukumba kete ya lʼumamu wʼuduwa, ya la wedi wa Jorodana la lutumbu, ee, Ngalili ka wedja.

² Wudja wakakendakendaka lʼudjima, Wakenyi usasi a wuki. Usasi ambohetela waku wakadjaseka lu kete, lu didjidji dia nyoi.

³ We ambuhamia wudja otekoya, Ambufudia ongenongeno awo. Vo wambongenangena la ntundu kaye, Uku atongenangenaka antu lu nshi ya dinela, Ndu uku atongenangenaka antu dia nkahana diango dia lohotola.

⁴ We ambulanya lokoho laki wutshu le ndi, Ukalimba wakokomolaka lʼokongo, la ohehela wa one lakusuyaka, Uku lu lushi la Midiyana.

⁵ Eloto tshe watolotaka usi ta lamʼendi lʼatei wa ta, Ndu ahondo wungitwami lu dikila, Wayukadjema lu lumbi, wayutshumbama la dja,

⁶ Ne dia wambututela ona, wambutusha ona pami. Diulelu diayuyala lu aheka andi. Wayuwole vati: Undaki a Mamba, Unyashungu a Wulu, Shesu ka Pundju, Uwandji wa Ki.

⁷ Diulelu diandi diayutahamanelaka, La ki kandi huyala lʼekumelu lu kiti ka Davidi, ndu lu diulelu diandi, Dia dishikike la dikikitsha uma lu akambu wʼusimbwi, Ndu uma lu sambu kʼololo, umaka kakiane edja ndu pundju Saki ka Latuyalaka Kanga lulimbilimbi kayutsha osoku.

Kele ka Latuyalaka le Isariyele

⁸ Khumadiondjo akatumela Jakoba diui, La dio diakakumi le Isariyele.

⁹ Antu tshe wayeya, Ndu Efarayima la asi Samariya, Wane watutaka lʼutaku la etema a wulu vati:

¹⁰ Atafadi wambukungo, keli shu tayuhika lʼave. Etamba wa khumu wakakotama, Keli shu tayune elundu lu ahuli awo.

¹¹ Okone Latuyalaka ayuwaunyiya apetshi wa Rezina dia ndo la wo; Ndi ayuwatomboshiya atunyi awo.

¹² Asi Suriya lu leke lʼehutwelu, La asi Filistiya lu leke lʼedjelu ka unya, Ku vo wayumana Isariyele lʼenyo hwe. Kuyanga osoku, kele kandi hakitakita, Ndu lunya landi lakasimbemadi.

¹³ Keli wudja hawukadimo le one latasuyaka, Kuyanga nyanga Latuyalaka Kanga lulimbilimbi.

¹⁴ Okone Latuyalaka akahimbula ote la wela, Dianga la sopo lu lushi otoi uma le Isariyele.

¹⁵ Ehangamendi la kanga lukumu weli ote, Ku umvutshi latetshaka kashi eli wela.

¹⁶ Wane watolombolaka wudja one watuwunganyiyaka; La wane watetawoka nombwama, watulanyemaka.

¹⁷ Okone Khumadiondjo hangenangena dia elongo awo wʼapami, Kuyanga mbuka ana awo wa ditshiki kana wadi waki edu awo ketshi. Vo tshe weli amonyodi la atshi wa kolo, Ndu enyo awo tshe nteketaka oteketateketa. Kuyanga osoku, kele kandi hakitakita, Lunya landi lakasimbemadi.

¹⁸ Kolo atohetaka uku dja, Yatutshumbaka adungu la atende. Yo yatutshumbaka akanda wa lʼukunda, Ku vo watumbelaka lu dinga.

¹⁹ Uma lu kele ka Latuyalaka Kanga lulimbilimbi, Mbatutshumbamaka kete, Ku antu watuyalaka uku kunyi ya dja, Nduku untu ayuhandja onangu.

²⁰ Vo wayunda lu lunya la pami, ku weki la ndjala; Ndu wayole uma lu wedi wa lomoso, keli wataluti. Vo tshe, untu lʼuntu ayole umunyi wʼusikandi.

²¹ Manase ayole Efarayima, la Efarayima, Manase, Ku vo ahendi wayolosha Juda. Kuyanga osoku, kele kandi hakitakita, Lunya landi lakasimbemadi.