Isaya 7 - La Bible en Otetela (Bible K'Ekila) 1991

Aui wa Jsaya le Ahaza

¹ Lu nshi ya Ahaza, onʼa Jotama, onʼa Uziya, khumʼekanga ka Juda, Rezina, khumʼekanga ka Suriya, la Peka, onʼa Remaliya, khumʼekanga ka Isariyele, wakatshu dia ntolosha Jerusalema, keli vo kumbeya mbalembia.

² Wakayutela khumbu ka Davidi vati: Asi Suriya wambudja la asi Efarayima sheki. Ku utema wa Ahaza la etema wʼasikandi wakasutshasutshama uku atusutshasutshamaka etamba la lopepe.

³ Latuyalaka akatela Isaya ati: Unela, we la onʼaye Sheara-Jashuba, la ntuhumana la Ahaza, utsha lʼekumelu ka wato wʼuduwa wa ladiku, utsha lʼekambo kʼuminyudi wʼahondo lu alangi.

⁴ Utuwuteli wati: Uyakimeli, uyali ki, tukaki woma, tateki sulu, ne dia kuma hyendi ya difuku dia dja yatuto dinga nye. Tukaki woma ne dia kele ka mamba ka Rezina la asi Suriya la ka ona Remaliya,

⁵ asi Suriya, Efarayima la onʼa Remaliya wambudja sheki ya nkutshela kolo vati:

⁶ Tutolosha asi Juda, tuwaukia woma, tolembia usumba awo, tudji onʼa Tabele khumʼekanga leko.

⁷ Okone mbata Khumadiondjo, Latuyalaka ati: Dikambu so hadiukuma, hadiutshama,

⁸ Ne dia Damaseke eli ote wa Suriya, La Rezina eli ote wa Damaseke. (Lʼokongo wa deku akumi asamalu la tanu, Efarayima ayuhandjwema, huyala wudja ntu)

⁹ Samariya eli ote wa Efarayima, La onʼa Remaliya eli ote wa Samariya. Naka nyu hanyetawo, mete nyu hanyushikikala.

¹⁰ Latuyalaka akateketa la Ahaza ntu ati:

¹¹ Olombe djimbitelu uma le Latuyalaka, Unyashungu aye, uyilombe, lu ahuli wa lʼesi kana lu ahuli wa la diku.

¹² Keli Ahaza akakaluya diui ati: Dimi halombe engo kana mpimba Latuyalaka.

¹³ Ku Isaya akati ati: Nyu khumbu ka Davidi, nyulungi, dikambu dia tshitshe mbedio dia nyu mpekuya antu, ndu dia nyu mpekuya Unyashungu ami uka?

¹⁴ Okone Khumadiondjo ndame ayunyu-sha djimbitelu. Enda, usekaseka a umuntu ayutsho diemi, ayuta ona pami, ayuwole lukumbu ati: Emanuele (kitshimudi ati: Unyashungu eko la su.)

¹⁵ Ndi ayole mateka la usanga, edja ndu ndi ambeya ntuna kolo la nsonola ololo.

¹⁶ Ntundu ona ako ateyi ntuna kolo la nsonola ololo, kete ya khumi ya dikanga hyendi yayutunama.

¹⁷ Latuyalaka ayukenya, we la wudja aye la khumbu ka sho, akambu wahatayala nduku lushi umaka lushi lakangana Efariyima uma la Juda ndu khumʼekanga kʼAsuriya.

¹⁸ Lushi lako, Latuyalaka ayeta tshingu uma la kumu ya kushi ya Edjibitu la ndjui uma lu kete yʼAsuriya la hyungi.

¹⁹ Yo yayuya, yayuyahema yo tshe lu minga ya hwe, lu weuku wʼave, lu etamba wʼatende ndu lu akumbu tshe.

²⁰ Lushi lako, Khumadiondjo ayohelola divu dia lʼote, diosa dia lʼekulu, ndu loledu la luhayu lakandasumbi uma la wedi a Ndjali, khumʼekanga kʼAsuriya.

²¹ Lu lushi lako, untu lʼuntu ayulama osongo wa ngombe la ekoko ehendi.

²² Awele wayuyala efula, la untu lʼuntu ayole mateka, ne dia untu tshe ayole mateka la usanga wayutshikala lʼatei a kete.

²³ Lu lushi lako, lu ahuli tshe waki ekodi wʼelua wʼushinga wa toshekele ta fesa kinunu, ayutumba adungu la atende.

²⁴ Paka la uta la pitu mbayukuma untu leko, ne dia kete tshe ayuyala la adungu ndu la atende atu.

²⁵ We hukuma ntu lu akuna tshe wakawakambaka la lungu, ne dia woma wʼadungu la atende. Vo wayuyala ahuli wa ngombe la ekoko mbikamelaka.