Isaya 64 - La Bible en Otetela (Bible K'Ekila) 1991

¹ Utunduyala we akati ulungu ndu akahulo, Tshiki ekungu wutusukasuka la ntundu kaye,

² Uku atohetaka dja lu lunyi lambuma, Ndu uku atuyuduyaka ashi, Tshiki atunyi aye wuteya lukumbu laye, Ndu wedja wutudidima la ntundu kaye.

³ Lamʼakayatshi akambu a wulu wakisu kunungamela, We akahulo, ku ekungu wakadidima la eyelu kaye.

⁴ Umaka mombokombola, nduku untu akuki kuyanga nimbitela, Nduku su diakenyi etemolatemola kekina, Katukimanyiaka wane watulungamelaka uku we.

⁵ We atuhandjaka waku watongenangenaka, ndu watutshaka ololo, Ee, wane watukuhoka lu mbuka yaye. Enda, we akuki kele, shu takatshi kolo; Tambusuwa loko edja, tayushimbamela?

⁶ Shu tshe tambuyala uku akanga a mindu, La ololo asu ambuyala uku dihondo dia mindu. Shu tshe tambolengela uku dikatshi, La kolo yasu yambutemba uku lopepe.

⁷ Nduku untu latetaka lukumbu laye, Latuhasahasaka dia nkumamema. Ntu, we akatushela elundji, We akatukimo dia shu nanyema lu kolo yasu.

⁸ Latuyalaka li, we keli shesu. Diwumba mbesu, we keli ukingi. Shu tshe teli ulimu wʼanya aye.

⁹ We Latuyalaka tutukaki kele ka wulu, Tuhoki kolo yasu pundju. Utendi, mbakosengasengasu; Shu teko wudja aye.

¹⁰ Esumba aye wʼekila waya shenga tshu. Siona aya shenga, la Jerusalema elanyelu.

¹¹ Luudu lasu lʼekila la dimena, Lene akakandulaka washesu, lambulungula. Ahuli asu wʼamena tshe wambulana.

¹² Latuyalaka li, lu akambu ane tshe, Ku we ndjakimelaka la ntshikalaka ki? Undi, we ayutetemala ntusuya?