Isaya 63 - La Bible en Otetela (Bible K'Ekila) 1991

Lushi lʼEsombweyo ka Latuyalaka

¹ Akona one ayayi uma lʼEdome, Olotshi ahondo wa tilili uma la Bazera, Ayakendakenda la shunganya lu wuki wa lukumu landi? Dimi latoteketaka la sambu kʼololo, Leko la wulu wa nshimbela.

² Okoko wana olotshiye ahondo wa tilili Uku one latohotshahotshaka elua lu ludu?

³ Dimi dime kakawamulaka lu yundja, Uma lʼatei wʼantu, nduku untu laki la mi, Ee, dimi lakahotshahotsha lu kele kami, Ee, lakahotshahotsha lʼududu ami. Ku dikila diawo diakamvutela lu ahondo, Okone ahondo ami tshe dikila tu.

⁴ Lushi lami la nsomboya leko lʼutema ami, Eleku kʼatshungwami ami kambukuka.

⁵ Dimi lakendi, ku nduku untu dia nkimanyiami; Lakambi ne dia nduku untu lakiko dia nsukelami. Okone lunya lami lakankimanyia, La ududu ami wakansukela.

⁶ Dimi lakahotshahotsha antu lu kele kami, Lakadjuya lʼududu ami. Dimi lakatshula dikila diawo lu kete.

Ololo wa Latuyalaka le Isariyele

⁷ Dimi layusanya dia ngandji ka shikaa ka Latuyalaka, Dia diandu dia Latuyalaka, Uma lu akambu tshe wakandatutshela. Dimi layuta dia ololo andi a wuki le khumbu ka Isariyele, Wakadatshi uku efula ka ketshi La ongonyi wa ngandji kandi ka shikaa.

⁸ Ndi akati ati: Mete, antu ami mbewo, Ana wahatshaka akambu wa lukesu. Ku ndi akayala ushimbedi awo.

⁹ Lʼatei asui awo tshe, ndi akasuwi kame la wo, Ana uma le olohe kana dikendji, Keli ndi ndame kakashinbela. Lu ngandji kandi la ketshi kandi mbakandashimbela; Ndi akasukelaka, akawaembaka tena tshe lu nshi yʼedjedja.

¹⁰ Keli vo wakotombokwela, Wakanyangia Nyuma kandi kʼekila; Diako mbakandayala utunyi awo, mbakandalo la wo.

¹¹ Ku vo wakuho nshi yʼedjedja ya Mose. Wakambwama vati: Lendʼeli one lakalombola wudja andi Kame lʼulami awo uma lʼuduwa? Lendʼeli one lakakitsha Nyuma kandi kʼekila lʼatei awo?

¹² Lendʼeli one lukanga lunya la mamba, Lakalombola lunya la pami la Mose, Lakati ashi la ntundu kawo dia mbete lukumbu landi pundju?

¹³ Lendʼeli one lakalombola lʼatei wʼohongo wʼuduwa, Uku falasa lʼusui diaha vo ntakana?

¹⁴ Uku atuhuloka nyama utsha lʼukidi, Mbakalombola Nyuma ka Latuyalaka dia vo ntumuya. Osoku mbakayalombola wudja aye, Dia lukumbu laye ntumbwama.

Dombelo Dia Mbukama Ketshi la Nkundja Ekimanyelu

¹⁵ Uhuluya ashu uma lʼulungu, Uma lʼedjaselu kaye kʼekila ka lutumbu. Endi, lendʼeli saki kaye la wulu aye na? Lukumbu lakasakelaka utema aye, La ketshi kakayambukaka, kambushila le mi.

¹⁶ We keli shesu, kuyanga Abarahama hatulimbetela La Isariyele hateyi kumbu. We Latuyalaka keli shesu, We katetamaka Ushimbedi asu umaka mombokombola.

¹⁷ We Latuyalaka, ukundi atuyutunganyiaka etali uma lu mbuka yaye, Ndu atuyukikitshaka etema asu diaha shu nkuka woma? Ukaluli le su ne dia ngandji katukaye, Shu ekambi aye, wauhu wʼukito aye.

¹⁸ Wudja aye wʼekila wakayala akanga wʼetemwelo Kaye etenyi ka tshitshe ketu, Ku atunyi asu wakakihotshahotsha.

¹⁹ Shu tambuyala uku antu wakiye kumbulela nduku lushi, Ndu waki kumbetama lu lukumbu laye.