Isaya 58 - La Bible en Otetela (Bible K'Ekila) 1991

Dikilelu DiʼOlolo Dia Ma

¹ Uhangohango wulu, tukitshakitshaki diui, Edia diui uku dimana. Uteli wudja ami dia ehedia awo, La luudu la Jakoba dia kolo yawo.

² Keli vo watunyangaka nshi tshe. Vo watongenangenaka dia nimbitela akambu ami, Watonombaka adjangu wʼololo. Vo watulangaka nsukana le Unyashungu uku wudja watutshaka ololo; Wahatutunaka elembe wa Unyashungu awo.

³ Na uhumba wa shu nkilaka ma, naka we henyi dikambu so? Na uhumba wa shu ndjakitshakitsha, naka we hadji ashu loko? Enda, lu lushi laye lʼekilelu ka ma, We atuyakimoka lu akambu wa ndjangenyangenya, Atukitshiyaka ekambi aye wetshu a wulu.

⁴ Enda nyu nyatukilaka ma, Paka dia mama la ndo ata, la dia nkomwana mbala ya wulu. Wuhu wakilanyu ma elo, Hawunyukimanyia dia aui nkuma lʼulungu.

⁵ Lushi layohenyahenya untu utema andi, Layundokole ote uku lokombe, Ndu layundetama lu wanga la lʼutuku, Mbayuyala kilu katumulangaka? Oso kayuyeta wati: Kilu, Lushi la ngenyangenya Latuyalaka uka?

⁶ Aha wuhu one wa kilu katumulangaka: Nkelekula molola wa kolo, Nkelekula okodi wa lohombo, Ntshungula asuyami, La mpimbula weuhu tshe wa koho?

⁷ Aha dia mbisha one leli la ndjala ma, Ndu dia mbotshiya one laha la dihuli dia mbidjase lu luudu laye? Aha dia lamʼenaye untu utakataka, ku we mbolotsha dihondo, Ndu diaha mboka unyaye untu okongo?

⁸ Usasi aye ayoheta uku sasi dia pindju. Ekonwelo kaye kayuyala esadi. Ololo aye ayutsho la ntundu kaye, La lutumbu la Latuyalaka layudihela lʼokongo aye,

⁹ Ku lamʼayuyolomba Latuyalaka, ndi ayukukela. Lamʼayuyuweta, ndi ayuta ati: Dimʼone! Naka we ayunya lokoho uma lʼatei anyu, La etshelu ka ntshumana pita la aui wa lotengo.

¹⁰ Naka we ayuyakimo dia nkimanyia one leli la ndjala La dia munduya saki kʼomenyi fono, Ku usasi aye wayoheta lu udjima, La udjima aye ayuyala uku yanyi ya midi.

¹¹ Latuyalaka ayukolombola ten a tshe. Ndi ayukutsha ehumba aye lu nshi ya pa. Ndi ayukikitsha weka aye. We ayuyala uku ekambo kamboloyama, Uku eteko kʼashi kahumi.

¹² Waye wayuhika ngelu ntu lu ahuli wakalana. We ayunyiya atshina wa nonga yaketi. Wayuketa vati: Olongosodi wʼahuli wakalana, Umbuludi wʼesese wʼantu mbidjase.

Elemielo ka Lushi la Mumuya

¹³ Naka we ayushimba lukulu laye lushi la mumuya, Diaha lo ntsha lulangu laye lushi lami lʼekila; Naka we ayete lushi la mumuya lushi lʼongenongeno, Ee, lushi lʼekila la Latuyalaka, lushi landi la nemo; Naka we ayulolemia diaha we ntsho lu mbuka yaye, Diaha we ndiakimo lu nangu yaye Kuyanga nteketa oteketateketa;

¹⁴ Ku we ayongenangena le Latuyalaka. Osoku dimi layukumbiya lʼahuli wa ladiku wa la kete. Ku layukongenyangenya lʼukito wa sho Jakoba, Ne dia Latuyalaka ndame kakati osoku.