Isaya 56 - La Bible en Otetela (Bible K'Ekila) 1991

Difutu Dia Elamelu ka Sheki ya Unyashungu

¹ Latuyalaka kata okone ati: Nyuyeli akambu wʼusimbwi, nyutshi akambu wʼololo, Ne dia panda kami kaya ka ndja, La etshungwelu kami kayenama.

² Untu latutshaka osoku eli la otshoko, Ndu onʼa untu latushikikalaka leko, Ee, one latulamaka lushi la mumuya diaha ndi lulanya, Ndu latushimbaka lunya landi diaha lo ntsha kolo.

³ Ongendangenda lambumamema le Latuyalaka tataki ati: Latuyalaka ayumamitula uma le wudja andi. Ndu olenga tataki ati: Utamba wambuma mbemi.

⁴ Latuyalaka kata okone ati: Le elenga watulamaka nshi yanyu ya mumuya, Watosonolaka akambu watongenyangenyaka, Ndu watushikikalaka lu sheki yami,

⁵ Mbayumusha dihuli la lukumbu lʼatei a luudu lami, Ndu lʼatei a peli diami uleki vo ndjala la Ana apami la ana amantu ololo. Dimi layuwasha lukumbu la pundju lahashishoki.

⁶ Ndu asi wedja watumamemaka Latuyalaka dia mbukambela ulimu, La dia mbuka lukumbu landi ngandji, La dia ndjala ekambi andi, Ee, wane tshe watulamaka lushi la mumuya diaha lulanya Ndu watushikikalaka lu sheki yami.

⁷ Dimi layuwaela lʼukungu ami wʼekila. Layangenyangenya lu luudu lami la dombelo. Layetawo eshasha awo la elambu awo lʼediakelu kami. Wayeta luudu lami vati: Luudu la dombelo la wedja tshe.

⁸ Okone mbata Khumadiondjo, Latuyalaka Latusanganyaka asi Isariyele wakatshanyema, ati: Dimi layusanganya ndu wedja ekina la Isariyele, Kame la wandi wakasanganyema edja.

⁹ Nyu nyama tshe ya lʼusui, nyuyi dia ndjole — Nyu nyama tshe ya lʼukunda.

¹⁰ Elami wa Isariyele weko tutshungu, Vo tshe waha la yimba. Vo tshe weli fo ya nyumi, yaheyi mpangohango. Vo watunyingonyingoka, watulangaka mbetama, watenaka alo.

¹¹ Elami ako weli fo ya lukaki, yahatulutaka. Elami ako hawutulimbitelaka. Vo tshe wambudiangana lu mbuka yawo hita, Dia untu lʼuntu ndjayangela waho walangandi;

¹² Ata ati: Nyuyi, lutsha nyanga wanu. Tono dinono dia wulu wuhu wʼanyanya. Katono ndu lui, ku lui djekaleka.