Isaya 55 - La Bible en Otetela (Bible K'Ekila) 1991

Esengoyelo ka Ushasha wa Ketshi le Antu Tshe

¹ Nyulungi, nyu tshe weli la pusa, nyuyi lu ashi. Ndu nyu wane waha la falanga, nyuyi, nyuyose, nyono. Nyuyi, nyuyose wanu la awele wososa, aha lʼushinga.

² Okoko wana atunyukimoka falanga yanyu lu kene kaha na? Dikambu kuna diatunyushishaka wulu anyu lu kene kahanyulutsha? Nyumbukeli, nyolekaki kene keli ololo. Etema anyu wangenangenaki lu mbu ya nde yʼololo.

³ Nyuhuke atui, nyuyi le mi. Nyumbukeli, Ku etema anyu wayuyala la lumu. Dimi layudja la nyu sheki ya pundju, Dia nshikike ngandji kanu le Davidi.

⁴ Enda, lakukitsha omenyi le wedja, Umbuledi la olombodi le antu.

⁵ Enda, we ayeta wedja wahayeyi. Ndu wedja wahakeyi wayulawo le ye, Ne dia Latuyalaka, Unyashungu aye, Ne dia lʼEkila la Isariyele, kambukutumbula.

⁶ Nyuyangi Latuyalaka lamʼeyandi ntanema. Nyolembaki lamʼekindi lasuki.

⁷ Untu a kolo aseke mbuka kandi, La one latusanguyaka kolo akimo tukanyi tandi. Akaluli le Latuyalaka, ku ndi ayuwuka ketshi, Ee, le Unyashungu asu, ne dia ndi ayetawo mbudimanyia tshe.

⁸ Tukanyi tami hatedima la tukanyi tanyu, Ndu ditshelu dianyu adiedimi la ditshelu diami, mbata Latuyalaka.

⁹ Uku anganyi ulungu la kete etali, Wuhu ako mbanganyi ditshelu diami la ditshelu dianyu, Ndu tukanyi tami la tukanyi tanyu etali.

¹⁰ Uku atolokaka mvula la lungi lʼekama la tshitshi uma lʼulungu, Ku yo hayukalula utsha leko edja ndu yo yambutaloyisha kete, Edja ndu yo yambutayitemisha, yambutatumbisha tumbatumba, Edja ndu yo yambutasha umbuki a wuhu wehu, la undeshi wa ma ma.

¹¹ Osoku mbatuyalaka diui diatutumbaka uma lʼunyo ami: Dio hadiutukalulaka le mi ukalulakalula. Keli dio diatutshaka lulangu lami Ndu diatushidiyaka kene kakamasanguya.

¹² Nyu nyayunela lʼongenongeno, nyayolombwama la ki. Akuna la ekungu wayimba kimbu yʼongenongeno la ntundu kanyu. La etamba tshe wa lʼusi wayuhuma saka.

¹³ Woto ayutumba lu dihuli dia atende, La wuma lu dihuli dia adungu. Dikambu so diayuyala euhwelu ka Latuyalaka, Djimbitelu ya pundju yahashilaki.