Isaya 53 - La Bible en Otetela (Bible K'Ekila) 1991

¹ Akona eya mbetawo aui wakatuki? Lunya la Latuyalaka lambenama le na?

² Ukambi ako akuli la ntundu kandi uku dimonga dia wodu, Uku teketa lu kete ya wumu. Lamʼatutuwenaka, ndi kema la elundji ka dimena Kana dimba dia lonyengo dia shu mbulanga.

³ Ndi akonywama, akasekama le antu, Akayala omenyi fono, akekela asui. Antu wakawushelaka dundji. Ndi akonywama, shu kumbolemia.

⁴ Mete, ndi akatembela asui asu. Akatutshwela la nyangu yasu. Keli shu takukani shati: Usuyami, Uhumwami, okomwami uma le Unyashungu.

⁵ Keli ndi akahumo ne dia kolo yasu, Akakomwama ne dia ehedia asu. Mete, ndi akasuwi dia shu ndjala kukeli, Akakomwama dia shu nkono.

⁶ Shu tshe takanganela uku ekoko, Takatshu untu lʼuntu lu mbuka kandi. Ku Latuyalaka akawahela kolo yasu shu tshe.

⁷ Ndi akahenyahenyama, akasuyama, Keli ndi kumvuta diui. Uku atolombwamaka onʼokoko utsha lʼediakelu, Uku atolembohalaka okoko La ntundu kʼahimbudi wa diosa, Osoku mbakindi kundjihula unyo.

⁸ Lu asui la dialelu, mbakandanyema. Akona lʼatei a lolonga landi etawo ati: Ndi akakomwama ndu akanyema uma lu kete ya wasena, Ne dia kolo ya wudja ami?

⁹ Kuyanga ndi kuntsha dikambu diako kana ndjala la aui wa lukesu lʼunyo andi Wakutshela diumbu kame lʼantu wa kolo. Ndu la kanga ongonyi, lamʼakandavu.

¹⁰ Keli Latuyalaka aketawo mbenya pa la asui. Lamʼakimondi lumu landi ulambu ne dia kolo, Ndi ayena tukanula, ndu ayufudia nshi yandi. Ku ulimu wa Latuyalaka wayuluwana lu anya andi.

¹¹ Lamʼeyena ukambi ami wʼololo Elua wa ulimu wa lumu landi, ndi ayongenangena. Uma lu ndjalimbitela kandi mbayunduyindja antu efula, Ndu mbayunduwaembela kolo yawo.

¹² Okone dimi layuwusha etenyi kandi pupu la antu a waki. Ku ndi ayukahana la antu a wulu diango dia dimbu, Ne dia ndi akakimo lumu landi lu nyoi, Akalema kame wʼantu wa kolo. Ndi akembela antu efula kolo yawo, Akateketela akanga wʼenungu.