Isaya 51 - La Bible en Otetela (Bible K'Ekila) 1991

Aui wa Nsamba Siona

¹ Nyumbukeli, nyu wane watuyelaka sambu kʼololo, Watuyangaka Latuyalaka. Nyendi dive lene akanyaselama, Ndu wuku wa difuku lene akanyosama.

² Nyendi shenyu Abarahama, ndu Sara lakanyuti, Ne dia ndi ndame kakameti. Dimi lakotshokola, lakufudia.

³ Latuyaʼaka ambusamba Siona, Ndi ambukanela ahuli tshe wakalana loko. Ndi ambukadimula shenga yayo uku Edena, Ndu ahuli wʼanyanya uku ekambo ka Latuyalaka. Ongenongeno a wuki ndu wa mamba wayutanema lʼatei ayo, Ndu eukelu ka lusaka la embelu kʼesambu.

⁴ Nyu antu ami, nyuhukami, Nyu wudja ami, nyumbisha lutui, Ne dia olembe ayutumba uma le mi, La dimi layushikike olembe ami. Dia vo ndjala usasi wʼantu.

⁵ Sambu kami kʼololo keko suki, panda kami kutsha ntumba, Ku anya ami wayulumbuya wedja. Asenga wayunkungela, wayekama lu lunya lami.

⁶ Nyedia ashu utsha lʼulungu, Ndu nyuhuluya ashu utsha la kete. Ulungu ayunyema uku dinga. Kete yayoko uku umusu wa dihondo. La wane watudjaseka loko wayuvo uku tshingu. Keli panda kami kayutshikalaka pundju, La sambu kami kʼololo huyala lʼekumelu.

⁷ Nyu ambeyi wʼakambu wʼololo, Nyu wane watudjaka olembe ami lʼutema nyuhukami. Tanyukaki dionyo diʼantu woma, Ndu tanyudidimaki lamʼanyotengawo.

⁸ Wediya ayuwale uku atuwolekaka ahondo. Tumumbu tayuwale uku atutoleka ahondo wa diosa. Keli ololo ami ayutshikalaka pundju, La panda kayuyalaka lu nonga tshe.

⁹ We lunya la Latuyalaka, emo, emo, ukikitali, Uku akayemoka nshi ya ntundu, lu nonga yʼedjedja! Aha we kakatshatsha Rahaba, kakatundutunduya shimiamba?

¹⁰ Aha we kakumia ashi wʼangundu, Kakati osese lʼuduwa dia atshungwami mbeta?

¹¹ Atshungwami wa Latuvalaka wayukalula, Wayuya la Siona wayimbi esambu. Ongenongeno wa pundju wayulula lʼetema awo, Wayomgenangena utamanya. Okei ia akhumu wayumo etali uma le wo.

¹² Dimi dime katukusambaka. We na, dia we mbuka untu lukuvo woma, La ona untu lufanyi lʼadiyu?

¹³ Ukundi ambuyuhela Latuyalaka, Utungi aye, Lakananula ulungu ndu lakahike atshina wa kete. Ku we ndjidimaka nshi tshe ne dia ngala kʼutunyi aye, Ne dia ndi nangaka nkudiaka! Kakona kayundeya ntsha la ngala kandi?

¹⁴ One lambukututala la wutshu ayutshungo esadi; Ndi havu, hoto lu diumbu, huhumba mbu ya nde.

¹⁵ Dimi keli Latuyalaka, Unyashungu aye, Latusutshasutshaka ashi a waki dia asukhu ndjikita. Mete, Latuyalaka Kanga lulimbilimbi keli lukumbu landi.

¹⁶ Dimi lambudja aui lʼunyo aye, Lambukukumba la dedi dia lunya lami, Dia nanula ulungu wʼuyuyu la mpika atshina lu kete yʼuyuyu, Ndu dia mvutela Siona nti: We eko wudja ami.

¹⁷ We Jerusalema, eto, eto, uneli! We akano dikoho dia kele ka Latuyalakaa Uma lu lunya landi. We akano dikoho dia yimba ntshimba tshe ndu ditshi.

¹⁸ Lʼatei ana apami tshe wakanduti, Nduku untu ayeya mbolombola. Lʼatei ana apami tshe wakandudia, Nduku untu ayeya mbukimela lu lunya.

¹⁹ Akambu ane ahendi wambukunda, ayukulela na? Ohenyohenyo la elanyelu, ndjala ka kasha la yombo. Ayukusamba na?

²⁰ Anʼaye wʼapami wamboko la yimba ntshimba, Wambetama lʼesese, uku peli kambundama lʼotei. Vo wambuludiama too la kele ka Latuyalaka, Ndu la luhangu la Unyashungu aye.

²¹ Okone ulungi, we omenyi fono, latudjoka aha la wanu.

²² Okone mbata Khumeye Latuyalaka, Unyashungu aye, Latoteketelaka wudja andi ati: Enda, lambunya dikoho dia yimba ntshimba uma lu lunya laye, Ee, dikoho dia kele kami. We hudino ntu!

²³ Layudikitsha lu anya a waku watukusuyaka; Watukutelaka vati: Ukututali, Keli shu teti ladiku diʼokongo aye. We akete okongo aye uku kete, Ee, uku osese wʼambetshetshi mbetaka.