Isaya 5 - La Bible en Otetela (Bible K'Ekila) 1991

Wela wʼEkambo kʼElua

¹ Dimi layimbela unangimi ami Usambu ne dia ekambo kandi kʼelua nti: Unangimi ami aki la ekambo kʼelua Lu dikuna diʼeteto efula.

² Ndi akafusi kete, akanya ave uma loko. Ndi akune kuno yʼololo leko; Ndi akahiki etangelu lʼatei ato. Ndi akakengi mbaka ka mbidjaka ashi wʼelua. Ndi akalungamela dia to nto elua wʼololo, Keli to kakato elua wʼululu.

³ Kakiane nyu asi Jerusalema, la nyu apami wʼasi Juda, Dimi lambunyosengasenga nti: Nyutusambuli dimi la ekambo kami.

⁴ Dikambu diakona diutumutsha ntu lʼekambo kami La diku dia akambu wakamatshi leko? Okoko wana, lamʼakamalungamela elua wʼololo Ku to nto elua wʼululu?

⁵ Kakiane dimi layukutela Kene kayumutshela ekambo kami. Dimi layuhandjula lukumbu lato, Ku to kayutshumbama. Dimi layunyukula peli diato, Ku to kayukamamela la ekulu.

⁶ Dimi layukitshika anyanya, Aha kihimbula tahi, aha kikamba. Ku adungu la atende wayudwanela leko, Layudjangela wangi, diaha vo nkiloshiya mvula;

⁷ Ne dia ekambo kʼelua ka Latuyalaka Kanga lulimbilimbi, Keli khumbu ka Isariyele, La apami wʼasi Juda weli lukuno lakandalangaka. Ndi akalungamela sambu kʼololo, Keli ndi akenyi paka etshulwelu ka dikila. Ndi akalungamela akambu wʼololo, Ku akuki alelu atu.

Mananu Yakawadji Antu a Kolo

⁸ Mananu kayali le waku waturaamanyaka Luudu lomotshi la lukina, Ndu ekambo kemotshi la kekina, Edja ndu dihuli hadiutanema ntu. Ku vo vame wayudjase lʼatei a wudja.

⁹ Dimi lakuki Latuyalaka Kanga lulimbilimbi, ata ati: Mete mete, mvudu efula yayutshikala hwe, Ya waki ndu yʼamena, yaha la untu loko.

¹⁰ Dikambo dikumi diʼelua diayutumba paka bata otoi kʼashi wʼelua. Dinela dia homera otoi ka wuhu ayuyala paka efa otoi.

¹¹ Mananu kayali le waku watetoka kʼolomo la pindju Dia ntayangi dinono dia wulu, La watutshikalaka leko ndu lʼutshu, Edja ndu wanu ambuwadjuya.

¹² Losese, dikimbi, ngomo, pungi la wanu, Watuyalaka lu alambu awo. Keli vo hawutudjaka yimba lʼulimu wa Latuyalaka. Ndu hawutukanaka yimba lʼulimu wʼanya andi.

¹³ Uma lu dikambu ne, wudja ami wayundama utsha lu fumbi, Ne dia vo kema la ewu. Antu awo wa lukumu wayuvo la ndjala, Ndu ului awo a wuki wayuma tu la pusa kʼashi.

¹⁴ Okone Udimu a Pengandu atufudiaka saki, Atokokolaka unyo awo hwe. Ku lutumbu la Jerusalema la ului ayo wʼantu watuhuloka utsha leko, Ndu ongenongeno ayo la one latongenangenaka loko.

¹⁵ Untu a kolo ayukutema, la untu a wuki ayukitshakitshama, Ndu ashu wʼakanga a lahi wayukitshakitshama.

¹⁶ Keli Latuyalaka Kanga lulimbilimbi atutumbwamaka la sambu kʼololo, La Unyashungu wʼEkila, atuyaenyaka ekila lu ololo.

¹⁷ Ku ana wʼekoko wayuhahulaka adiyu uku lu dihuli diawo, Ndu angendangenda wayole diango uma lʼahuli wʼelanyelu wʼakanga wʼengonyi.

¹⁸ Mananu kayali le waku watukutulaka kolo la ekodi wa kashi, La kolo la eshinga wa wulu wa lu pusupusu;

¹⁹ Watutaka vati: Latuyalaka asamariya, Angasanya ulimu andi, dia snu mbena! Didjangu dia lʼEkila lʼIsariyele diayi, Diasukani dia shu dilimbitela.

²⁰ Mananu kayali le waku watetaka kolo ololo, la ololo kolo; Watukadimulaka udjima usasi, la usasi udjima; Ndu watukadimulaka ululu mpe, la mpe ululu!

²¹ Mananu kayali le waku watuyaenaka akanga a tumba lu ashu awo, Ndu watuyakanaka akanga a bewu!

²² Mananu kayali le waku wambuyala ahuka lu noshi dia wanu, La apami wa dihunga lu nsohanya dinono dia wulu;

²³ Watuyindjaka antu wa kolo ne dia mbu yʼutshu, La watunyaka sambu kʼololo uma le untu laha la unungu!

²⁴ Uku atutshumbaka shasi ya dja nengese, Ndu uku atutshumbaka lumbi la dja adiyu wambuma, Okone edu awo wayohonda, ndu alembo awo wayudiangana uku ditshu; Ne dia vo wakatuni elembe wa Latuyalaka Kanga lulimbilimbi, Ndu wakonyala diui dia lʼEkila lʼIsariyele.

²⁵ Okone kele ka Latuyalaka kambufulanela le wudja andi. Ndi ambusimbula lunya landi dia mbasuya; Ekungu wambudidima; Ndu edu awo wambuyala uku ndjetete lu esese. Kuyanga akambu aso tshe wakatshama, kele kandi kumumo. Ndu lunya landi lakasimbwi tshu.

²⁶ Ndi ayuhanela wedja wʼetali ekuhu ka koi, Ndu ayudela waku weli la kuma ya kete pungi. Ku vo wayuya esadi, esadi.

²⁷ Nduku layokomo, nduku layutakana Nduku layunyingonyingo, kana ndala djo; Nduku uya wʼuntu wayotewo, Nduku okodi wa sabata wayuhimbo.

²⁸ Pitu yawo yeli sodi, La eta awo wambolemama. Akaka wa falasa yawo weko uku ave, La etshimbi wa pusupusu uku punganendji.

²⁹ Dikita diawo diayuyala uku dia tambwe. Vo wayudikita uku esongo wa tambwe; Vo wayukhungula, wayunda nyama kawo, Wayukitola ku nduku untu layeya nkihotola.

³⁰ Lushi lako, vo wayukhungula la diku diato Uku atudikitaka asukhu wʼashi a waki. Lamʼayenda untu kete, ndi ayena udjima la okei; Usasi ayukadimo udjima lu wangi.