Isaya 49 - La Bible en Otetela (Bible K'Ekila) 1991

Isariyele, Ukambi wa Latuyalaka le Wedja

¹ Nyulungi, nyu wane wudjashi lu asenga. Nyuhukami, nyu wedja wʼetali. Latuyalaka akambeti uma lʼutema wa nyomi, Akambole lukumbu umakʼeutwelu kami.

² Ndi akete unyo ami uku yombo ya diesa. Ndi akankumbi la didjidji dia lunya landi; Ndi akambete luhitu la sodi. Ndi akambishe lʼukulu andi a pitu.

³ Ndi akamvutela ati: Isariyele, we keli ukambi ami, Uma le ye mbayumutumbwama.

⁴ Keli dimi lakati nti: Dimi lakakambi ukambakamba. Dimi lakashisha wulu ami ushishashisha. Keli dialelu diami diʼololo dieko le Latuyalaka, La difutu diami dieko le Unyashungu ami.

⁵ Latuyalaka akantungi lʼutema wa nyomi, Dia dimi ndjala ukambi andi, Dia nkaluya Jakoba le ndi, Ndu dia nsanganya Isariyele la ntundu kandi ntu, Ne dia dimi lambolembiama lu ashu wa Latuyalaka, La Unyashungu ami eko wulu ami.

⁶ Kakiane ndi ambuta ati: Eko dikambu dia tshitshe dia we ndjala ukambi ami, Dia mbulula wedja wa Jakoba, La dia nkaluya atshikadi wa Isariyele. Kakiane dimi lambukete usasi le asi wedja, Dia we nkumia panda kami lu kuma ya la kete.

⁷ Okone mbata Latuyalaka, Utshungudi wa Isariyele ndu lʼEkila landi, La one latuhetshamaka le wedja, Latuwengaka waengekhu, ukambi wʼambuledi, ati: Khumi ya dikanga la ewandji wayukena, wayunela. Vo wayotemola Latuyalaka leli la kolamelu, Ee, lʼEkila la Isariyele, lakakosonola.

Ambulaka Dia Mbulula Siona

⁸ Okone mbata Latuyalaka ati: Lʼetena ka ngandji kami kayumukukaluya diui, Ndu lu lushi la panda mbakamakukimanyia. Dimi layukulama ndu layukushikike, Dia we mbidja la wudja sheki, Dia we mbulula luhanga, Ndu dia nkahanya ahuli wakalana;

⁹ Dia we mvutela asi lukanu wati: Nyutumbi; La wane wudjashi lʼudjima wati: Nyutumbi lʼusasi. Vo hawuhumba ma lu mbuka, Ne dia wayutatanaka mbu ya nde lʼete wʼakuna.

¹⁰ Vo hawuyala la ndjala kuyanga pusa kʼashi; Yanyi hayuwahetela wulu, Ne dia one latuwaukaka ketshi ayalombola, Ee, ayalombola lʼumamu wa teko diʼashi.

¹¹ Dimi layete ekungu ami tshe mbuka, Ndu layukitanyia esese ami.

¹² Enda, vo wayuya uma lʼetali: Amotshi uma la ngelʼa kushi, Ndu uma lʼedjelu ka unya, La akina uma lu kete ya Sinime.

¹³ Ulungu, ongenengene; kete imbi usambu wʼongenongeno; Ekungu, nyudji dielu diʼongenongeno! Ne dia Latuyalaka ambusamba wudja andi, Ndu ayuka emenyi fono andi ketshi.

¹⁴ Keli Siona akataka ati: Latuyalaka ambonseka Khumadiondjo ambumbuhela.

¹⁵ Wali mbeyaka mbuhela ona lalomiandi? Umbutshi huki onʼandi lakanduti ketshi uka? Vo mbeyaka mbuhela undu, keli dimi haleyi nkuhela.

¹⁶ Enda, lambufunda lukumbu laye lu anya ami, Peli dia usumba aye ndjalaka nshi tshe la ntundu kami.

¹⁷ Anʼaye watusamanyaka lʼulimu. Wane wakakulanyaka la wakakuhandjulaka, Wayumo uma lʼatei aye.

¹⁸ Edia ashu aye, endi lʼutshimba. We henyi vo tshe wambomota kame, wambuya uya le ye: Uku wemi la lumu! mbata Latuyalaka, We ayuyalotshawo uku elengalenga. We ayuyakelekawo uku atolotaka Usekaseka a umuntu layanga ntshukama.

¹⁹ Umaka kakiane, Antu aye wayuyala pika lu ahuli wakalanyema Ndu wakayala atongo atu lu wudja aye. Ndu wane wakakomenaka esudia, wayangana etali.

²⁰ Anʼaye wakuto lu fumbi, wayuyukutela vati: Dihuli diemi, diambotekoya pika, Unyangeli dihuli diayukuka dimi mbidjase.

²¹ Ku we, Siona, ayuta lʼutema aye wati: Akambelawo na? Ne dia dimi lakashisha anʼami, lakatshikala uku ekumba; Lakayala fumbi ndu yekeko, ku akona akawaudia? Dimi lakatshikala dime; ku ana ane, uma lendi akiwo?

²² Khumadiondjo, Latuyalaka kakati okone ati: Enda, layedia lunya lami utsha le wedja, Layuhane ekuhu kami ka koi utsha le antu. Ku vo wayuya la anʼaye wʼapami lʼanya awo, Wayemba anʼaye wʼamantu lu aheka.

²³ Khumi ya dikanga la wadiewo wayukuleshaka. Vo wayokole dundji diawo la kete, wayukotemola; Wayolombola ditshu diʼuma lu akaka aye. Ku we ayeya wati: Dimi keli Latuyalaka, Ne dia wane watunkungelaka, hawutshama sonyi.

²⁴ Untu mbeyaka mpotola engo ka dimbu uma le kanga wulu? Kana ntshungula fumbi uma le kanga ngala uka?

²⁵ Elu, mbata Latuyalaka, Fumbi yakandama le kanga wulu, mbeyaka ntshungwama, La engo ka dimbu kakose kanga ngala, mbeyaka mpotwama; Ne dia dimi layolo la wane watukoloshaka, Ndu dimi layushimbela anʼaye.

²⁶ Dimi layuleshaka wane watukusuyaka emunyi awo hita. Ndu vo wayono dikila diawo hita, Wayudidjo uku wanu wʼuyuyu. Ku antu tshe wayeta vati: Dimi keli Latuyalaka, Ushimbedi aye, Utshungudi aye, Kanga Wulu la Jakoba.