Isaya 47 - La Bible en Otetela (Bible K'Ekila) 1991

Elumbwelu ka Babilona

¹ Babilona li, we usekaseka a umuntu, Ukiti, udjase lʼatei a ditshu. We Kaladiya, ona umuntu, udjase lu kete, Aha lu kiti ka diulelu, Ne dia vo hawuyuketa engo kʼololo ka dimena ntu.

² Ose ukanda, oto asami; unya kitambala kaye, Ukululi ahondo aye wʼushinga wulu; Utshiki pelohelo lʼandja, uteho kushi weme.

³ We ayuyala utakataka, ayutshama sonyi. Dimi layosomboya, haluhandja nduku untu,

⁴ Mbata Utshungudi asu, lʼEkila la Isariyele, Letawo vati: Latuyalaka Kanga lulimbilimbi.

⁵ We Kaladiya, ona umuntu, utshu, utudjase ki lu udjima, Ne dia vo hawuyuketa umbuledi a waulelu ntu.

⁶ Dimi lakuki wudja ami kele, Lakonyola ukito ami, lakakimo lʼanya aye, We kumbauka ketshi. We akasuya esumbi la elimu a wulu.

⁷ We akataka wati: Dimi layuyalaka umbuledi pundju. We kunama akambu ane lʼutema, Kuvanga nkana yimba ne dia ekumelu kawo.

⁸ Kakiane ulungi dikambu ne, we latuyangenyaugenyaka, We latudjaseka la lutui tshitshi, We latutaka lʼutema aye wati: Dimi, nduku ledimi la mi. Dimi handjalaki wadi aki udu, kuyanga nshisha anʼami!

⁹ Keli akambu ane ahendi: Eshishwelu kʼana la wadi aki udu, wayuya le ye shashimuya. Kuyanga we la wetshi la ekanga efula, vo wayukuma le ye,

¹⁰ Ne dia we akekamaka lu kolo yaye; Akataka wati: Nduku untu lamena! Yimba yaye la ewu kaye wakakukesaka. Ku we akataka lʼutema aye wati: Dimi, nduku ledimi la mi.

¹¹ Okone kolo kayuya le ye, Ohenyohenyo wayuya le ye. We heya mbutshanya. Elanyelu kahayeyi kayuya le ye shashimuya. Ekanga aye haweyi nkishimba.

¹² Emali lʼatei wʼekanga aye ndu wʼawulu aye, Watuyutshaka umaka nshi yaye va dikenda. Tendi kana vo wayukusha wulu, Kana wayukukimanyia dia mbutsha antu woma.

¹³ We ambuheko nungamela ekimanyelu Uma le ambeyi wʼakambu wa lʼulungu, watendaka toto, Watutaka akambu uma lu talelu ta ngondo. Vo wemali, wakushimbeli, wakuteli akambu wahatayi.

¹⁴ Enda, vo weli uku adiyu; dja yayatshumba. Vo haweyi ndjashimbela uma lu lumbi la dja. Dja yako hayukuka untu djuka, Kuyanga nsukana suki la yo.

¹⁵ Osoku mbayuyala elanyelu ka waku watukambaka la ye, Waku watukukesaka umaka nshi yaye ya dikenda. Vo wayudiangana untu lʼuntu lu dihuli diandi, Nduku otoi ayeya nkushimbela.