Isaya 46 - La Bible en Otetela (Bible K'Ekila) 1991

¹ Dikishi dianyu, Bele la Nebo, diamboko. Nyu nyambudiemba, nyambudiahe ladiku dia punda la ngombe. Dio diambuyala ushiko ladiku dia nyama yambokomo.

² Dikishi diako diamboko kame. Dio hadieyi nshimbela wudja. Dio diame diambembama utsha lu fumbi.

³ Nyum lukeli, nyu wa lu luudu la Jakoba, Nyu atshikadi tshe wa lu luudu la Isariyele. Dimi dime kakanyulamaka lʼetema wʼanyengenyu, kakanyembaka umakʼeutwelu kanyu,

⁴ Edja ndu esumbi anyu. Layunyusukelaka, Edja ndu lamʼayunyuyala esumbi wa lukusumbi. Dimi lakanyembe, layunyembe ntu. Dimi layunyusukela, layunyushimbela.

⁵ Akona ayunyumbedika la ndi, Dia dimi mbedima la ndi? Akona ayunyunfanya la ndi, Dia dimi la ndi ndjala pupu?

⁶ Antu mbatutundjaka paunyi uma lu atapa awo, Mbatedikaka fesa lu kilo, mbatufutaka utshudi wa paunyi, Dia ndi mbatshela etemolatemola uma loko. Ku vo watukikhusamelaka, watukitemolaka.

⁷ Vo watukiediaka, watukiembaka lu diheka, Ndu watukikitshaka lu dihuli diato, Ku to Katutshikalaka leko. To hakieyi nsukasuka. Lamʼatukilelelaka untu, to hakieyi mbukaluya diui, Kuyanga mbushimbela uma lu pa kandi.

⁸ Nyu akanga wʼehedia, nyuho dikambu ne, Nyukani yimba loko, nyudikitsha lʼutema.

⁹ Nyuho akambu waki lu nshi yʼedjedja, Ne dia dimi keli Unyashungu, nduku ukina. Dimi keli Unyashungu, nduku ukina lufanyi le mi.

¹⁰ Dimi lakataka lʼetatelu akambu wukuyala lʼekumelu, La lu nshi yʼedjedja akambu wahatayi. Dimi lambuta nti: Alaka ami wayushikikala, Ku layutsha kene tshe kalangami.

¹¹ Dimi laketi pungu uma lʼehutwelu, Untu uma le kete yʼetali, Dia ndjushidiya sangweyu diami. Dimi lakati dikambu ne, layudishidiya. Lakadisanguya, layuditsha.

¹² Nyu wane watukikitshaka etema, Wakangana uma lu panda, nyumbukeli.

¹³ Dimi lambusukanya etshungwelu kami, To kema etali ntu. Panda kami hatshimbatshimba. Dimi layukitsha panda kami lu Siona, Ndu lutumbu lami lu Isariyele.