Isaya 44 - La Bible en Otetela (Bible K'Ekila) 1991

Latuyalaka Ndame Keli Unyashungu

¹ Ukambi ami Jakoba, Isariyele lakamasonola, ulungi!

² Latuyalaka lakakutungi lʼutema wa nyo, Ndu latukukimanyiaka, kata ati: We ukambi ami Jakoba, we Jeshurana lakamasonola, tukaki woma.

³ Dimi layutshulula ashi lu kete yambuma, Layutunga ekedi lu kete yʼufumbu. Dimi layutshulwela diuhu diaye lumu lami, La tukanula taye otshoko ami.

⁴ Vo wayulaka uku adiyu lʼumamu wʼashi, Uku eduwula lʼumamu wʼekedi.

⁵ Omotshi ayuta ati: Dimi leli la Latuyalaka; Ukina ayuta ati: Lu diuhu dia Jakoba kemi. Lʼasatu ayufunda lu ewambu kandi ati: Dimi leko la Latuyalaka; ayuyadja lu diuhu dia Isariyele.

⁶ Latuyalaka, Khumʼekanga ka Isariyele La Utshungudi andi Kanga lulimbilimbi kata ati: Dimi leli etatelu ndu ekumelu. Nduku Unyashungu ukina weko paka dime.

⁷ Akona edimi la mi? Eya mvuta akambu wahatayi uku dimi? Ndi awati, atulimbitshiya okondo Umakʼetena kakamakitsha wedja wʼedjedja. Ndi atuteli akambu wayanga ntshama ndu akambu wahatayi.

⁸ Tanyukaki woma, tanyudidimaki; dimi kunyenya, Ndu kunyutela dikambu ne umaka nshi yʼedjedja uka? Nyu nyeli emenyi ami: Unyashungu ukina weko uku dimi? Kema; dimi mbeyaka nti: Nduku dive dikina dieko.

Eko Enginya Dia Ntemola Dikishi

⁹ Wane watoselaka dikishi weko dinginya; la dikishi diawo diatuwulangaka dieko anyanya. Atemodi wa dikishi weli akanga a tutshungu ndu antu waha la yimba; ekumelu kawo eli sonvi.

¹⁰ Akona atutshaka etemolatemola kana ekishi ka lolelola, ku hakundji ekimanyelu?

¹¹ Enda, wane tshe watukambaka loko, wayutshama sonyi, ndu atshi adio weli paka antu. Vo tshe wamote, wemali. Ku vo tshe wayudidima wayutshama sonyi kame.

¹² Utshudi a mbulu atudjaka luwulu lu akalanga, atulutshulaka la uhumo, atulolongosola la lunya landi la wulu. Ndi atukaka ndjala, atokomoka dimba, atonoka ashi, atushilaka wulu.

¹³ Utshudi wʼabaya atedikaka utamba la ushinga, atusangulaka usatu wʼekishi loko la di-kalanga, atudjaka tulimbitelu tato la okodi wʼutshimbedi. La kaku, mbatu-ndoselaka ekishi kufanyi lʼuntu, dia to ndjalaka lu luudu.

¹⁴ Ndi atokotaka esasi, atosonolaka woto kana ulungu, atuweteka dia vo mbula lʼatei ukunda. Ndi atuneka usasi, ku mvula yatuwudiaka.

¹⁵ Utamba ako atukimanyiaka untu dia mpetsha dja. Ndi atuwunaka kunyi, atohetshaka dja, atuyukaka, atukateka ma. Ku ndi atutshaka etemolatemola la wo, atukitemolaka, atoselaka ekishi, atukikhusamelaka.

¹⁶ Ndi atohetshaka dja la etenyi ka hendi kʼutamba ako. Lu dja yako katundufumbaka unatshi, atolekaka, atulutaka, atukaka dja; atutaka ati: Haa! haa! Lambuka dja, lambusalanganya dimba.

¹⁷ Ku la etenyi ka hendi kutshikadi, ndi atoselaka etemolatemola kemotshi, ekishi kandi. Ndi atukikhusamelaka, atukitemolaka, atukilombaka ati: Unshimbeli! We keli Unyashungu ami.

¹⁸ Vo haweyi, hawukani yimba. Ashu awo wambudihama, hawosene. Etema awo wambudihama, haweyi nimbitela akambu wa yimba.

¹⁹ Nduku otoi lʼatei awo ayukana yimba; ayuho ati: Lakatshumbi etenyi ka hendi kʼutamba one lu dja. Lakakate ma lu dja yawo, lakafumbi unatshi lu akalanga awo, lakali? Ku layutsha engo ka wononyi la etenyi kʼutamba kambutshikala? Undi, layukhusamela etenyi kene kʼutamba?

²⁰ Ndi atolekaka utuku. Utema andi wa lukesu watuwunganyiyaka. Ndi heyi nshimbela utema andi; kana mvuta ati: Aha kashi kene kukimedimi lu lunya lami la pami?

Latuyalaka, Ushimbedi wa Isariyele

²¹ We Jakoba, Isariyele li, uhoki akambu ane, Ne dia we eko ukambi ami. Dimi lakakutungi; ukambi ami mbeye. Isariyele li, dimi halukuhela.

²² Dimi lambunya ehedia aye uku atukumboka lungi; La kolo yaye uku atetaka dingi, Ne dia dimi lakakushimbela, Ukaluli le mi, ne dia dimi lakakushimbela.

²³ Ulungu li, imbi usambu, Ne dia Latuyalaka kambutsha dikambu ne. Nyu ehongo wa la kete, nyuhangohango. Nyu ekungu, ekunda, la etamba tshe weli loko, Nyudji dielu diʼongenongeno, Ne dia Latuyalaka akashimbela Jakoba. Ndi ayutumbwama lu Isariyele.

²⁴ Latuyalaka, Ushimbedi aye, La one lakakutungi lʼutema a nyo, kata ati: Dimi leli Latuyalaka, latutshaka akambu tshe. Dimi dime kakananula ulungu, La dime kakasandjula kete, akona akankimanyia?

²⁵ Dime katufutanyaka tulimbitelu ta akanga a kashi. Dime kateteka wetshi wʼawulu dipoka. Dimi katukaluyaka akanga a yimba ekongokongo, Katukadimulaka yimba yawo enginya.

²⁶ Dime katushikikeka diui diʼukambi ami. Dimi latushidiyaka akambu wahatayi watutaka akendji ami. Dimi latutaka dia Jerusalema nti: Antu wayudjase loko; La dia esumba wa Juda nti: Vo wayuhikama ntu. Dimi layuluwanya ahuli awo wakalana.

²⁷ Dimi katutelaka dingunda nti: Umi; dimi layumia ekedi aye.

²⁸ Dimi katutaka dia Kuro nti: Ndi eli ulami ami wʼekoko. Ndi ayushidiya lulangu lami tshe. Ndi ayuta dia Jerusalema ati: Yo yahikami ntu; La dia etemwelo ati: Atshina ato wahikami.