Isaya 42 - La Bible en Otetela (Bible K'Ekila) 1991

Ukambi wa Latuyalaka

¹ Enda ukambi ami latumusukelaka. Osonami ami, latongenangenaka utema ami. Dimi lakawahe lumu lami, Ndi ayutela wedja dia dialelu diʼololo.

² Ndi huhangohango, hedia diui diandi. Diui diandi hadiukema lʼesese.

³ Ndi hahimbula sopo diakawaminula, hadimi ushinga wa tala, wakatumbi dinga. Ndi ayulumbuya la sambu kʼololo.

⁴ Ndi huheko, huyala la ohodu edja ndu lamʼayundushikike sambu kʼololo la kete. Antu wa lʼumamu wa ashi a waki watulungamelaka wetshelu andi.

⁵ Okone, mbata Unyashungu Latuyalaka, lakatungi ulungu, lakunanula; lakasandjula kete la diango dieli loko, latufufaka antu weli loko luwi, ndu latushaka wane watokendakendaka loko lumu.

⁶ Dimi Latuyalaka, lakaketi la esangweyu ka shikaa. Dimi layukukimela lu lunya, layukulama, layukete daka le wudja ami, la usasi lu wedia,

⁷ dia nsenya ashu wʼakanga a tutshungu la ntshungula wane wakandama uma lu lukanu la waku wudjashi lʼudjima uma lu difuku diʼasui.

⁸ Dimi keli Latuyalaka. Oso keli lukumbu lami. Dimi halakimo lutumbu lami le ukina, kana nemo diami le dikishi.

⁹ Enda, akambu wakatama ntundu, wambutshama, lambukutela akambu wʼeyuyu. Ntundu vo watatshama, mbamumukutelawo. Diandu le Latuyalaka ne dia Etshungwelu kandi ka wuki.

¹⁰ Nyimbeli Latuyalaka usambu wʼuyuyu, Nyu wane watetetaka lu ashi a waki, ndu wane watudjaseka loko, Nyu asenga la tshe wudjashi loko, Nyuwandulaki pulu ndu la kuma ya kete.

¹¹ Usui wa shenga la esumba weli loko, Nyu ngelu yudjashi asi Kedara, wedia aui awo. Wane wudjashi la Sela wimbi esambu lʼongenongeno. Wadji waelu wʼongenongeno uma lʼete wʼekungu.

¹² Watumbulaki Latuyalaka, Wawandulaki lu asenga.

¹³ Latuyalaka ayunela uku kanga wulu. Ndi ayufudia ngala kandi uku dihuka dia wulu. Ndi ayedia diui, ayuhangohango, ayenya atunyi andi wulu andi.

¹⁴ Dimi lakatshikala ki edja, Lakalembohala, lakayakimela. Keli kakiane, dimi iayuiela uku umuntu latata lono, Layuhetula lakema akemo.

¹⁵ Dimi layete ekungu la akuna shenga tshu, Layumia tumbatumba tshe, layete ekedi losenga lutu, Layumia eduwa tu.

¹⁶ Dimi layolombola akanga a tutshungu lu mbuka kahaweyi, Ee, lu mbuka yahaweyi, mbayumalombola. Dimi layukadimnla udjima yanyi la ntundu kawo. Ndu layusimbula ahuli wʼakote. Osoku mbayumutsha. Dimi haluwaseka.

¹⁷ Waku watekamaka dikishi dia lutshula, Watutelaka dikishi dia lolelola vati: Ditemolatemola diasu mbenyu, Wayukalula ekongokongo, wayolombo la sonyi.

Isariyele Wambusuwa, ne dia Vo Hawulangi Mbekiyama

¹⁸ Nyu akanga wa puki, nyuki! Nyu akanga a tutshungu, nyendi, ndu nyosene!

¹⁹ Akona eli tshungu, uku ukambi ami? Eli luhuki uku dikendji diamumutuma na? Eli tshungu uku unangimi ami? Eli tshungu uku ukambi wa Latuyalaka?

²⁰ We menaka akambu efula, keli we hewo. Atui aye weko hwe, keli we huki.

²¹ Uma lʼololo wa Latuyalaka mbakandangenangena, Dia mbete olembe wuki la uluwanyi.

²² Wudja one mbakawakhumuya diango, mbakawahandjula! Vo tshe wambundama lu tulunga, Wambudjama lu mvudu ya kanu. Vo wambuyala uku nyama kambundama, Ku nduku untu lakishimbela. Weli uku diango dia lohotola, Ku nduku untu lata ati: Nyudikaluya.

²³ Akona lʼatei anyu ayuhuke tui lu akambu ane? Akona ayulanga inbahukama La mbalunga ne dia etena kayayi?

²⁴ Akona akakimo Jakoba dia ndjala engo ka lohotola, La Isariyele le apotodi, aha Latuyalaka? Shu takutshela kolo, konkendakenda lu mbuka yandi, Kunknanyia olembe andi.

²⁵ Ndi akatshulwela u ludu wa kele kandi la ngala kandi ka ta. Ndi akadingi la dja, keli vo kunimbitela. Ndi akatshumbi, keli vo kunkitsha dikambu ne lʼutema.