Isaya 4 - La Bible en Otetela (Bible K'Ekila) 1991

¹ Lu lushi lako, amantu esambeli wayukimela pami otoi, wayuwutela vati: Shu tayolekaka ma diasu hita, ndu tayolotaka ahondo asu hita. Keli dikambu otoi, etawo dia shu mbetama lukumbu laye; utunyiya sonyi kene!

Lutumbu la Jerusalema la lu Nshi Yayayi

² Etena kako, dimonga dia Latuyalaka diayuyala dimena ndu la lutumbu. Elua wa la kete wayuyala ololo ndu dimena le asi Isariyele wambuhanda.

³ Okone atshikadi wa lu Siona, la wa lu Jerusalema, wayetama vati: Ekilami, untu lʼuntu lambufundama lʼatei a wasena wa lu Jerusalema,

⁴ lamʼayotsha Khumadiondjo esekaseka wʼamantu wa lu Siona mindu yawo, ndu lamʼayundedia dikila dia Jerusalema uma lʼunungu adio la efufelu ka sambu kʼololo, ndu kʼetshumbelu.

⁵ Latuyalaka ayukumba Ukungu a Siona la ahuli adio wa sanganya la dingi dia dinga la yanyi, la lumbi la dja lʼutshu, ne dia lutumbu tshe layukumbama.

⁶ Etumbu kayuyala leko dia ndjala dedi la yanyi, la dia ndjala dihuli diʼeshamelu uma lu ngimbi la mvula.