Isaya 39 - La Bible en Otetela (Bible K'Ekila) 1991

Hezekiya Ambulungula Akendji Uma la Babilona

¹ Lʼetena kako Merodaka-Baladana, onʼa Baladana, khumʼekanga ka Babilona, akatumela Hezekiya mukanda la ushasua, ne dia ndi akuki lukumu ati: Ndi aki la kandji, ku ambokouo.

² Hezekiya akangenangena dia mbalungula. Ndi akawaenya diango diandi diʼushinga a wulu diaki lu luudu: fesa, paunyi, diango diʼepumu, iso kʼushinga a wulu, ndu luudu landi la diango lia ta, ee, diango tshe diʼongonyi andi. Nduku engo kaki lu luudu la Hezekiya, kana kaki lu diulelu diandi, kakindi kumbaenya.

³ Umvutshi Isaya akayi le khumʼekanga Hezekiya, akawumbula ati: Kakakutedi antu ane, la uma lendi akawayi na? Hezekiya akûkaluya diui ati: Vo wakayi le ni uma lu kete yʼetali, uma la Babilona.

⁴ Ndi akawumbula ntu ati: Kakawenyi lu luudu laye na? Hezekiya akûkaluya diui ati: Vo wakenyi diango tshe dieli lu luudu lami Nduku engo lʼatei a wau-mbelu ami kakimi kumbaenya.

⁵ Isaya akatela Hezekiya ati: Uki diui dia Latuyalaka Kanga lulimbilimbi.

⁶ Enda etena kukuyala, wayemba diango tshe dieli lu luudu laye, la kene tshe kakatakumbedi washo edja ndu elo, utsha la Babilona. Nduku engo kayutshikala, mbata Latuyalaka.

⁷ Vo wayotola ndu ana aye wʼapami wambuyuta, dia ntuwaete elenga lu luudu la diulelu la khumʼekanga ka Babilona.

⁸ Ku Hezekiya akatela Isaya ati: Aui wakati Latuyalaka lʼunyo aye nkukaka Ndi akakani yimba ati: Ayuyala eku la lutui tshitshi lu nshi ya lumu lami.