Isaya 36 - La Bible en Otetela (Bible K'Ekila) 1991

Eyelu ka Ta Dia Senakeribe

¹ Lʼeleku ka dikumi lʼanei ka diulelu dia khumʼekanga Hezekiya, Senakeribe, khumʼekanga kʼAsuriya, akayi dia ndjolosna esumba tshe wa wulu wa la Juda, ku akelembia.

² Khumʼekanga kʼAsuriya akatumi olombodi kame lʼului a wulu wʼalimbi uma la Lakishi utsha la Jerusalema, le khumʼekanga Hezekiya. Olombodi ako akayemala lu kungi ka lʼuduwa wa ladiku, lu osese wʼutsha lʼekambo kʼuminyi wʼahendo lu alangi.

³ Ku Eliyakima, onʼa Hilikiya, uwandji wa luudu la khumʼekanga, akatshu le ndi kame la Shebina, ufundji, la Joa, onʼa Asafu, okondodi wʼekondo.

⁴ O imbodi wʼului w alimbi akawatela ati: Nyututeli Hezekiya nyati: Khumʼekanga ka wuki, khumʼekanga kʼAsuriya kakumbula ati: Akona eli usuko aye? Le na ekamiye?

⁵ Dimi lambukutela nti: Aui wa utata, esangweyu kaye, la wulu aye wa ndo ta, weko anyanya. Le na ekamiye, dia we ntombokwelami?

⁶ Enda, we ambekama ukalimba wʼEdjibitu, lo-kombe lambowele. Lo layuhumuya untu tshe layulekama, layutundula lunya landi. Osoku mbatutshelaka Farayo, khumʼekanga kʼEdjibitu, antu tshe watuwekamaka.

⁷ Kana we ayumvutela wati: Shu tatekamaka le Latuyalaka, Unyashungu asu. Keli aha lu dikambu diandi mbakahandjula Hezekiya alunga la diakelu, atela asi Juda la Jerusalema ati: Kanyo-temolaki lʼediakelu kene?

⁸ Kakiane, yaka, udji la khumemi, khumʼekanga kʼAsuriya, sheki. Ku dimi layukusha falasa nunu pendi, naka we la antu weya mbahema.

⁹ Ukundi atshanyaye uwandji wuleki tshitshe lʼatei wʼekambi wa khumemi, dia mbekama Edjibitu ne dia pusupusu ya ta la ambahemi wa falasa?

¹⁰ Undi, dimi lambuya dia ndjulanya wudja one aha la wulu uma le Latuyalaka? Latuyalaka kakamvutela ati: Uneli, utolosha wudja one, utulanya.

¹¹ Ku Eliyakima, Shebina la Joa wakatela olombodi ako vati: Tambukosengasenga shati: Otekete la ekambi aye lu oteketa wʼArama, ne dia shu mbeyaka. Toteketaki la su lʼoteketa wʼasi Juda, ne dia alami wa lukumbu lʼusumba watukuka.

¹² Keli olombodi ako akakaluya diui ati: Undi, le khumeye, ndu le ye kakantumi khumemi dia ndjunyutela aui ane? Aha le elami ene walama usumba, wayole tumi tawo ndu wayono wanyi awo kame la nyu uka?

¹³ Ku olombodi wʼalimbi akemala, akahangohango la diui dia wulu lʼoteketa wʼasi Juda ati: Nyuki aui wa khumʼekanga ka wuki, khumʼekanga kʼAsuriya!

¹⁴ Khumʼekanga kata ati: Tanyetawoki Hezekiya nyukesa, ne dia ndi heyi nyushimbela.

¹⁵ Tanyetawoki aui wayunyutela Hezekiya dia nyekamia le Latuyalaka, ati: Mete, Latuyalaka ayunyushimbela; usumba one holembiama le khumʼekanga kʼAsuriya.

¹⁶ Tanyetawoki aui wa Hezekiya, ne dia khumʼekanga kʼAsuriya kata ati: Nyuyi le mi, nyuyudji la mi sheki. Ku nyu tshe untu lʼuntu ayole uma lʼekambo kandi kʼelua, ndu uma lʼutamba andi wa fingu. La untu lʼuntu ayono ashi uma lʼushima andi,

¹⁷ edja ndu lamʼayumuya dia ndjunyosa. Ku layutsho la nyu utsha lu kete yufanyi la kete yanyu, kete yeli la mbu ya nde la wanu wʼeyuyu, lenʼeli mbu ya nde la dikambo diʼelua.

¹⁸ Hezekiya tanyudimbiyaki ati: Latuyalaka ayutushimbela. Lʼatei a ditemolatemola tshe dia wedja, undi, etemolatemola kemotshi kakahandja wudja ato uma lʼanya wa khumʼekanga kʼAsuriya?

¹⁹ Ditemolatemola dia Hamata la dia Arapada, lendiʼedio? Lenʼeli ditemolatemola dia Sefaravayina? Dio diakatshungula Samariya uma lʼanya ami uka?

²⁰ Lʼatei a ditemolatemola tshe dia wedja one, diakona diakatshungula wudja adio uma lʼanya ami, diayutshungula Latuyalaka Jerusalema uma lʼanya ami?

²¹ Keli vo wakalembohala ki, kumbukaluya nduku diui, ne dia khumʼekanga akadjanga ati: Tanyukaluyaki nduku diui.

²² Ku Eliyakima, onʼa Hilikiya, uwandji wa luudu la khumʼekanga, la Shebina, ufundji, la Joa, onʼa Asafu, okondodi wʼekondo, wakatshatsha ahondo awo. Vo wakayi le Hezekiya wakayuwutela aui uma le Rabishake.