Isaya 35 - La Bible en Otetela (Bible K'Ekila) 1991

Lutumbu Layuyala la Siona

¹ Usui wa shenga la kete ya wumu wayongenangena. Kete yʼufumbu yayutundja mamasongo yato alembo wʼamena.

² Mamasongo yako yayoto alembo efula. Ku kete yako yayongenangena, yayimba esambu wʼongenongeno. Yo yayukundja lutumbu la Lebanona, La dimena dia Karamele, ndu dia Sharona. Vo wayena lutumbu la Latuyalaka la dimena dia Unyashungu asu.

³ Nyukikitsha anya wa wodu, nyushikike adui wa yekayeka.

⁴ Nyuteli akanga wʼetema wa woma nyati: Nyukikitali, tanyukaki woma, Nyendi Unyashungu anyu lu ndjayi la esombweyo, difutu dia Unyashungu. Ndi ndame ayuya, avuyunyushimbela.

⁵ Ashu wʼakanga a tutshuneu wayosena. La atui wʼakanga a puki wayuka.

⁶ Akanga a tshumbi wayulimbolimbo uku peli La kanga lumi ayimba esambu. Ashi wayufukofuko lʼusui wa shenga, La ekedi wʼashi wayokela lu kete yʼufumbu.

⁷ Ditshu diaheta diayukadimo uduwa, La kete ya wumu yayukadimo teko diʼashi. Seke diaketamaka mbulu diayukadimo landa, Ku adiyu wayukadimo asopo la kungu.

⁸ Mbuka kayuyala leko, osese a wuki wayuweta vati: Osese wʼekila. Wane wahatalongoswama haweti loko. Tekeko la akanga a dinginya haweyi mbetola utsha loko. Osese ako ayuyala dikambu diʼekilami etu.

⁹ Nduku tambwe kayuyala leko, Kuyanga nyama ka ngala, yo hayutanema loko. Ekilami etu mbayetaka loko.

¹⁰ Atshungwami wa Latuyalaka wayukalula, Wayukuma pulu la Siona wayimbi esambu. Ku ongenongeno wa pundju wayukumba ete awo. Vo wayutamanya ngenangena, Ku okei la tukuku wayushila.