Isaya 33 - La Bible en Otetela (Bible K'Ekila) 1991

Latuyalaka Ayela Panda

¹ Mananu kayali le ye, we unanyishi laki kunanyema weme! We latohotolaka antu diango keli vo kunkohotola. Lamʼayuyushila nanya akina, ku we ayulanyema. Ndu lamʼayuyushila mpotola antu diango, Wayukohotola ndu we.

² We Latuyalaka, utuki ngandji ka mamba; shu takakulungamela. Uyali ekimanyelu kasu pindju tshe, Ndu panda kasu lu nshi ya pa.

³ Uma lu lundju la diui diaye mbatulawoka antu. Ndu lamʼatunyunelaka, wedja watudianganaka vwa.

⁴ Ekundji awo wayomotshama uku atomotshamaka eto. Antu wayesusana uku atususanaka endjo akatshi.

⁵ Latuyalaka atumbwamaki, ne dia ndi atudjaseka lʼulungu; Ndi atuludiaka Siona la akambu wʼusimbwi la sambu kʼololo.

⁶ Panda ka mamba, yimba, la ewu, Wayushikikala lu nshi yanyu. Woma wa Latuyalaka weli ukundji anyu.

⁷ Enda, ahuka wuda tukuku lʼandja. Akendji wa ki wulela wulu.

⁸ Esese wambutshikala anyanya, hawuyeteta loko ntu. Alaka wambulanyema; emenyi wambonywama; Untu holemiama ntu.

⁹ Kete yaya lʼutanda, Lebanona ambukanana, ambolengela. Sharona ambuyala uku usui wa shenga. Bashana la Karamele watololoka akatshi.

¹⁰ Kakiane layunela, mbata Latuyalaka, Layuyaedia, layutumbwama.

¹¹ Nyu nyayutsho waemi wa puhudi, nyayuta adiyu. Luwi lanyu leli dja yayunyutshumba.

¹² Antu wayutshumbama, wayuyala uduwu utu, Uku adungu wambokotama, wambutshumbama lu dja.

¹³ Nyu wane weli etali, nyuhukami uku amumutsha. Nyu wane weli suki, nyetawo wulu ami!

¹⁴ Antu wa kolo wa lu Siona wambuka woma, Amonyodi wa Unyashungu wambusaka lukumba. Akona lʼatei asu ukuki mbidjase lasuki la dja yadikita? Akona lʼatei asu ukuki mbidjase lasuki la nyumbi ya dja ya pundju?

¹⁵ One latokendakendaka lu akambu wʼololo, ndu latoteketaka akambu wʼusimbwi; One latuhetshaka waho wa lohotola, One latunyanginyulaka anya watukukimela mbu yʼutshu, One latudihaka atui andi Ne dia ndi atukuka akambu wʼetshulwelu ka dikila, La one latudihaka ashu andi watukena kolo,

¹⁶ Untu ako ayudjase lu ahuli wa ladiku. Ave wa wulu wayuyala lungeli landi la ta. Ndi ayulungula ma, ayutanaka ashi tena tshe.

¹⁷ Ashu aye wayena khumʼekanga lu dimena diandi. Vo wayena kete lu wuki ayo tshe.

¹⁸ Utema aye ayukanaka yimba lu akambu wa woma vati: Lendʼeli ufundji? Lenʼeli ulungudi wʼelambu? Lendʼeli one lakalaka tangelu?

¹⁹ We hayena wudja wa ngala ntu, Wudja wateketa oteketa wahayamani fundu, La oteketa wa kana wahayeyi.

²⁰ Endi Siona, usumba wa nshi yasu ya waki yakawashikike! Ashu aye wayena Jerusalema, edjaselu ka ki, Luudu la dipema lahembamaki ntu. Lo leko la dikoho diahunwamaki pundju, La ekodi wahahimboki.

²¹ Latuyalaka ayuyala la su leko lu lutumbu. Ekedi a waki la tokoko wayuyala leko. Keli watu wa luduka kana mashua a waki haweyi nkuma leko.

²² Latuyalaka keli umbadi asu, keli umbidji asu wʼelembe. Ndi keli khumʼekanga kasu, ndi kayutushimbela.

²³ Ekodi aye wambotewo. Vo hawuyukimela utamba wa mashua wulu, hawuyunanula apema ntu. Ku diango dia dimbu diayukahanyema, Ndu akanga wa tshumbi wakose etenyi.

²⁴ Nduku untu ludjashi la Jerusalema ayuta ati: Dimi la kandji! Antu wa leko wayudimanyiama kolo yawo.