Isaya 32 - La Bible en Otetela (Bible K'Ekila) 1991

Khumʼekanga kʼOlolo

¹ Enda, khumʼekanga ayulela la sambu kʼololo, La ewandji wayolombola antu lu akambu wʼusimbwi.

² Ku untu lʼuntu ayuyala uku eshamelu uma lu lopepe, Uku ukumbo uma lu ngimbi, Uku ekedi wʼashi lu kete ya wumu, Ndu uku dedi dia dive dia wuki lʼusui watuhekuyaka antu.

³ Ashu a waku watosenaka, hawuyala lungi; La atui a waku watukaka, wayuka ololo.

⁴ Utema wa kanga enginya wayulimbitela yimba, La lulimi la kanga dikukuma layeya nteketa esadi.

⁵ Hawuyeta kanga enginya ntu vati: Kanga lukumu, Kuyanga kanga unyishi ntu vati: Kanga lukahu;

⁶ Ne dia kanga enginya atoteketaka oteketateketa, La utema andi ayuyakimoka lu kolo, Dia monyola Latuyalaka lu mvuta kashi lu dikambu diandi, Dia ntshika utema wa one leli la ndjala hwe, La nshimba ashi le one luka pusa.

⁷ Diango diʼulimu dia kanga lukesu dieli loko. Ndi atusanguyaka nanya omenyi fono lʼaui wa kashi, Ndu uhumbi pupu lamʼatandi aui wʼololo.

⁸ Keli kanga lukumu atusanguyaka akambu wa lukumu, La uma lu akambu wa lukumu, mbatundushikikalaka.

Wambewula Amantu wa la Jerusalema

⁹ Nyu amantu watudjaseka udjasedjase, nyuneli, nyulungi diui diami. Nyu ana wʼamantu watuyasemaka, nyuhuke atui.

¹⁰ Lʼokongo wa mvula otoi la nshi motshi, Nyu amantu watuyasemaka, nyayukanana, Ne dia dikambo diʼelua hadiongona, la dinela diadio hadiuyala.

¹¹ Nyu amantu watudjaseka udjasedjase, nyudidimi. Nyu wane watuyasemaka, nyuyali la woma! Nyukululi ahondo, nyuyali etakataka, Nyolote akutu lu kendi yanyu.

¹² Nyuyakomole lu tulu, Ne dia euhwelu ka dimena diʼekambo la engonelo kʼelua.

¹³ Adungu la atende wayutumba lu kete ya wudja ami, Ee, ladiku dia mvudu tshe yʼongenongeno ndu lʼusumba wʼongenongeno

¹⁴ Ne dia luudu la khumʼekanga layutshikala hwe, La usumba a wuki ayutshikala tongo tu. Vo wayuyala ahuli wa nyama mbetama. Mangana yayongenangenaka loko, Ndu dungalunga diayolela adiyu loko.

¹⁵ Enda, ndu Nyuma ka Unyashungu ambutuhulwela uma lʼulungu. Ku usui wa shenga ayukadimo ekambo kʼelua La ekambo kʼelua ayuyala uku ukunda.

¹⁶ Ku akambu wʼusimbwi ayuyalaka lʼusui wa shenga, La sambu kʼololo ayutshikalaka lʼekambo kʼelua.

¹⁷ Ulimu wa sambu kʼololo wayuyala lutui tshitshi, La elua ato weli ki la elungamelu pundju.

¹⁸ Wudja ami wayudjase lu dihuli dia lutui tshitshi, Edjaselu kaha la ohenyohenyo, lu edjaselu ka ki.

¹⁹ Ukunda ayunyuko lamʼayolo mvula ka mboko, La usumba ayukitshakitshama kʼesi.

²⁰ Nyu wane watukaka wehu lʼemamu wʼashi tshe, Nyeko la ongenongeno, ndu nyatutshungulaka ngombe la punda.