Isaya 31 - La Bible en Otetela (Bible K'Ekila) 1991

Asi Edjibitu Weko Antu Waha Unyashungu

¹ Mananu kayali le waku watutshokaka Utsha lʼEdjibitu dia ntuyanga ekimanyelu, Watekamaka falasa ndu wayuyasemaka Ne dia efula ka pusupusu la wulu wʼambahemi wa falasa. Keli vo hawutendaka utsha le lʼEkila lʼIsariyele, Kuyanga nyanga Latuyalaka.

² Keli ndu ndi eli kanga yimba, ayela elanyelu; Ndi hukadimula aui andi. Keli ndi ayunela dia ndo la atshi wa kolo ta, La dia ndosha waku watukimanyiaka wane watutshaka kolo.

³ Asi Edjibitu weko antu, vo kema Unyashungu. Falasa yawo yeko paka emunyi, aha pundju. Lamʼayusimbula Latuyalaka lunya landi, Ukimanyidi ayudidima, la one lakimanyiama, ayoko. Ku vo tshe wayulanyema kame.

⁴ Okone mbakamvutela Latuyalaka ati: Lamʼatudikitaka tambwe la ona tambwe ladiku dia nyama kakayandji, Kuyanga ului wʼelami wʼekoko wayuyihangwela, Yo hayuki woma la luhangu lawo, kuyanga ndjamonye, Ne dia efula ka lundju lawo. Okoso mbayuhulo Latuyalaka Kanga lulimbilimbi Dia ndjolo ta la Ukungu a Siona ndu la dikuna diawo.

⁵ Uku atudamaka fudu ekeli ayo, Osoku mbayulama Latuyalaka Kanga lulimbilimbi Jerusalema. Ndi ayulama, la a nhandja, ayuwumba ayushimbela.

⁶ Nyu asi Isariyele nyukadimo utsha le one lakanyatombokwela!

⁷ Lu lushi loso untu tshe ayukadja dikishi diandi dia fesa la dia paunyi diakanyayatshela la anya anyu dia ntsha kolo.

⁸ Asi Asuriya wayudiakema la yombo yaha uma le untu. Ku yombo yako yaha yʼuma le untu, yayatshatsha. Vo wayulawo yombo, la elongo awo wʼapami wayundama lu fumbi.

⁹ One latuwekamaka, ayulawolawo la woma, La olohe awo wayudidima la ntundu ka dembela, Mbata Latuyalaka lukanga dja yeli lu Siona, La khuka ka dja keli lu Jerusalema.