Isaya 28 - La Bible en Otetela (Bible K'Ekila) 1991

Dianyelu Dia Efarayima

¹ Mananu kayali le dembo dia kusu diʼutaku diʼambidjoki wa la Efarayima. Ndu le dembo diambolengela, diateteka elengalenga kandi ngaingai. Lʼote wʼukidi wʼeteto wa wane watudjoka wanu!

² Enda, Khum; liondjo eko la ukimanyidi a wuki ndu a wulu, Layuhumanya antu la ngala la kete, Uku mvula ka mboko, ngimbi kʼelanyelu, Mvula ka wulu katutungaka elula.

³ Dembo dia kusu diʼutaku diʼambidjoki wa Efarayima Diayohotshahotshama lʼekulu.

⁴ Dembo diambolengela diateteka elengalenga kandi ngaingai, Dieli lʼote wʼukidi wʼeteto, Diayuyala uku ulua a ntundu wambela. Lamʼayena untu ulua ako lu lunya landi, ndi ayuwole esadi.

⁵ Lushi loso, Latuyalaka Kanga lulimbilimbi ayuyala lufule la lutumbu, La dembo dia kusu dia dimena le atshikadi wa wudja andi.

⁶ Ndi ayuyala lumu la sambu kʼololo le one ludjashi lu kiti kʼelumbwelu, Wulu le waku watutshanyaka atunyi lu asuku wa ngelu.

⁷ Keli ndu vo, watusukosukoka la wanu, Watengengoka la dinono dia wulu. Elombedi la amvutshi watusukosukoka la dinono dia wulu, Wambolembiama tshe la wanu. Vo watengengoka la dinono dia wulu, watungaka lu dienelo. Vo watutakanaka lamʼatuwusambulaka akambu.

⁸ Mesa tshe wambulula too la tuwoki, Nduku hyuli yeli kema diango dia mindu.

⁹ Akona ayundetsha yimba? Akona ayundulimbitshiya wetshelu? Wane wukidishawo awele, Wane wahayoloma?

¹⁰ Ambuyala didjangu la diku dia didjangu, didjangu la diku dia didjangu, Wetshelu ladiku dia wetshelu, wetshelu ladiku dia wetshelu, Yema lane, yema lane.

¹¹ Kema, uma lʼunyo wa kanga dikukuma, La uma lʼoteketa wa kana, Mbayoteketa Latuyalaka le wudja one.

¹² Ndi akawatela ati: Mumuya kene, Usha one lambolemba mumuya. Dihuli dia mumuya ne! Keli vo kunanga mbuka.

¹³ Okone diui dia Latuyalaka diayuyala le wo: Didjangu ladiku dia didjangu, didjangu ladiku dia didjangu; Wetshelu ladiku dia wetshelu, wetshelu ladiku dia wetshelu; Yema lane, yema lane. Okone lamʼatawatshu, vo watokokaka akalikali, Watowediawediamaka, wundami, wukelekami.

Wambewula Jerusalema

¹⁴ Okone nyu amonyodi watulelaka wudja one wa Jerusalema, Nyulungi diui dia Latuyalaka!

¹⁵ Nyu nyatutaka nyati; Shu takadji la nyoi sheki, Ndu takukana la Udimu a Pengandu. Lamʼayeta sui dia wulu, dio hadiusukana la su, Ne dia shu tambete kashi eshamelu kasu, La lukesu elawelu kasu.

¹⁶ Diako mbata Khumadioudjo, Latuyalaka ati: Enda, lambukitsha dive etshina dia Siona ka shikaa, Dive diedikami ololo, dive dia lu tshuku diʼushinga a wulu, dive diushikikami shikaa. One layudiekama huhasahasa dia ndawo.

¹⁷ Dimi layete elumbwelu kʼusimbwi ushinga wa mbedika too, La sambu kʼololo yediko ya nsimbula. Mvula ka mboko ayulanya edjaselu ka kashi, La ashi wayuyala elula lu dihuli diʼeshamelu ka lukesu.

¹⁸ Sheki yakanyadji la nyoi yayulanyema. Diukanelu diakanyukana lʼUdimu a Pengandu, hadiushikikala. Lamʼayeta fono ka wulu, To kayunyohotshahotsha.

¹⁹ Tena tshe diayukietaka, to kayunyundaka, Ne dia to kayetaka pindju tshe, ndu la yanyi ndu lʼutshu. Untu tshe layuka lukumu lato, ayudidima la woma.

²⁰ Tangi keko mundumundu, untu heyi nsimbo loko, La dihondo dia nkumba tshitshi hadiukuki ndjakumba.

²¹ Latuyalaka ayunela uku akandatshi lʼukungu a Perazima, Ndi ayumala uku akandumala lʼukidi wa Ngibiyona, Ne dia ndi ntsha ulimu andi, ee, ulimu andi wa mamba. Dia ndi nshidiya etsha andi, ee, etsha andi wa mamba.

²² Kakiane, nyukimo dionyo, Ekodi watukunyushinganya wulu, Ne dia lakuki didjangu diʼelanyelu ka wudja tshe Uma le Khumadiondjo, Latuyalaka Kanga lulimbilimbi.

²³ Nyuhuke atui, nyuki diui diami! Nyuhukami, nyumani oteketa ami fundu!

²⁴ One latufusaka kete dia mune, Atuyifusaka nshi tshe uka?

²⁵ Lamʼayundushidiya nkamba, ndi hatokomaka ahoho, Hatukaka konde, hatuneka epunga wa yelela la komba, La wa menge lu leke lukina, la dikomi lʼelelu uka?

²⁶ Unyashungu andi atolombolaka ololo, atuwetshaka.

²⁷ Hawutuwulaka ahoho lʼukanda, Hawutetshetshaka etshimbi wa pusupusu la falasa ladiku dia konde dia ndjisusula, Keli watususulaka konde la tshamba, watuwulaka ahoho lʼanya.

²⁸ Vo watetshetshaka etshimbi wa pusupusu La falasa la diku diʼepunga ne dia mbesusula, Keli epunga hawutulanaka, Ne dia vo hawututetemalaka mbesusula nshi tshe.

²⁹ Ndu dikambu ne diambuya uma le Latuyalaka Kanga lulimbilimbi. Alaku andi weli mamba, la yimba yandi yeli wuki.