Isaya 25 - La Bible en Otetela (Bible K'Ekila) 1991

Usambu wa Diandu ne Dia Ololo wa Latuyalaka

¹ Latuyalaka li, we keli Unyashungu ami. Dimi layukutumbula, layandula lukumbu laye, Ne dia we akatshi akambu wa mamba. We akashidiya alaka wakayalaki la kolamelu la mete.

² We ambete usumba tuta dia ave, Ndu ngelu ka wulu elanyelu. Luudu la diulelu lʼasi wedja lambuhandjo, Lo haluhikama ntu.

³ Okone wudja a wulu wayukutumbula, La esumba wa wedja wa ngala wayukuka woma.

⁴ We aki eshamelu kʼusi wula, Eshamelu kʼuhumbi lu pa kandi, Ehandelu uma lu ngimbi, la dedi uma lu luhaladi. Luwi lʼakanga a ngala leli Uku ngimbi lʼeheli ka lukumbu la ngelu,

⁵ Uku luhaladi lu kete ya wumu, We atukitshakitshaka lundju lʼasi wedja wa ngala, Uku atututshaka dedi dia dingi luhaladi; Osoku mbatuyolembohayaka akanga a ngala.

⁶ Lʼukungu one, Latuyalaka Kanga lulimbilimbi ayolongoswela antu tshe dambu diʼololo, dambu dia wanu wʼololo, dambu dieli la uhiho, dambu dia wanu wambolongoswama ololo.

⁷ Lʼukungu one, ndi ayulanya ukumbo watukumbaka antu tshe, ee, ukumbo watukumbaka wedja tshe.

⁸ Khumadiondjo, Latuyalaka ambunya nyoi pundju. Ndi ayukitula asoi tshe uma lu ashu awo, ndi ayunya wudja andi uma lu sonyi tshe ka la kete; ne dia osoku mbata Latuyalaka.

⁹ Lushi lako, antu wayuta vati: Enda, one eli Unyashungu asu. Shu takukungela, dia ndi ntushimbela. Onʼeli Latuyalaka, lakatakungelaka. Tongenengene, tuleki ngenangena lu panda kandi.

¹⁰ Lunya la Latuyalaka layutshikala lʼukungu one. Moaba ayohotshahotshama lu dihuli diandi, uku atohotshahotshamaka adiyu lʼukutu.

¹¹ Ndi ayusimbula anya andi lʼatei antu andi, uku atusimbulaka untu anya dia ntsho usali. Keli Latuyalaka ayukitshakitsha utaku awo, la komba yʼanya awo.

¹² Ndi ayulanya lungeli lawo la ta, ayulutedia tshe.