Isaya 24 - La Bible en Otetela (Bible K'Ekila) 1991

Elumbwelu ka Latuyalaka le Wedja

¹ Enda, Latuyalaka ambulanya kete, ambuyete shenga. Ndi ambuyikadimula etshulitshuli, Ambudianganya wane wudjashi loko vwa.

² Uku ayuyala le wudja, mbayuyala le olombedi, Uku ayuyala le ukambi a umuntu, mbayuyala le khumendi ka umuntu, Uku ayuyala le usumbi, mbayuyala le usundjishi, Uku ayuyala le osombi, mbayuyala le osondjanyi, Uku ayuyala le one latukundjaka waho, mbayuyala le one latukimoka waho.

³ Kete yayulana tshe, yayutshikala anyanya, Ne dia osoku mbakandjanga Latuyalaka.

⁴ Kete yambuda tukuku, yambokomo. Andja wambukitakita wulu, waya mbalakata. Ewandji wa wedja wambushila wulu.

⁵ Kete yambulanyema uma le wane wudjashi loko, Ne dia vo wakahediaka elembe. Vo watutunaka adjangu, wakalanya sheki ya pundju.

⁶ Okone mananu kambulanya kete, La wane wudjashi loko wambusuwa, ne dia enungu awo. Okone wa la kete wambutshumbama, Paka atoi atu mbambutshikala

⁷ Wanu wʼuyuyu hawuyuyala ntu, Okodi wʼelua wambolengela. Wane wakangenangenaka, wukhuma akhumu.

⁸ Ongenongeno wa ngomo ambushila. Lundju la waku watongenangenaka lambukume, La ongenongeno wa losese ambushila.

⁹ Hawuyono wanu, hawuyimba kimbu. Dinono dia wulu diayuyala ululu le anoshi.

¹⁰ Usumba wʼufutanu wambulanyema, Luudu tshe lambudihama. Nduku untu leya mboto loko.

¹¹ Wambulela lʼesese ne dia wanu kema. Ongenongeno tshe wambukadimo okei, Ongenongeno wa la kete wambukume.

¹² Elanyelu kambuya lʼusumba, Kuki yambulanyema.

¹³ Uku atutshikalaka atoi wa mbeli lʼokongo wʼesutshesutshelu ka tahi yʼutamba, Ndu uku atutshikalaka atoi wʼelua lamʼatuwumbaka, Osoku mbayutshikala atoi wʼantu lʼatei a wedja wa la kete.

¹⁴ Atshikadi ako wambuhangohongo wulu, wambimba esambu ne dia ongenongeno. Vo wambudja waelu uma lu leke lʼedjelu ne dia wukiwuki wa Latuyalaka.

¹⁵ Nyu wa lu leke lʼehutwelu ka unya, nyotemole Latuyalaka. Ndu nyu wa lu leke lʼedjelu, Nyutumbuli lukumbu la Latuyalaka, Unyashungu wa Isariyele.

¹⁶ Shu takuki esambu wa diandu uma lu kuma ka kete vati: Lutumbu layali le Untu Ololo. Keli dimi lakati nti: Lambonda la lunyangu! Lambonda la lunyangu! Mananu kambuya le mi! Ne dia akesanyi wambutsha lukesu, Akesanyi wambutsha lukesu la wulu.

¹⁷ Woma wa mamba, wawu la djunga Wambukukungela, we ludjashi la kete!

¹⁸ Okone one latulawoka lundju la woma, atutambelaka lu wawu; La one latutumbaka uma lu wawu, atutalaka lu djunga. Adidishi wa lʼulungu wambudihwama, La atshina wa kete wambusukasuka.

¹⁹ Kete yambate palala, Yambudiangana vwa, Yambusutshasutshama wulu.

²⁰ Kete yambusukosuko uku umbidjoki, Yambengengo uku kipoi. Kolo kayo kambuyala wutshu ladiku diayo; Yo yamboko, ku hayunela ntu.

²¹ Lu etena kako, Latuyalaka ayusuya Ului wʼantu weli lʼulungu lʼulungu, Ndu khumi ya dikanga ya la kete la kete.

²² Vo wayomotshama kame Uku asi lukanu lu luudu la pika, Wayudihama lu lukanu. Ku lʼokongo wa nshi kambi, wayusuyama.

²³ Ngondo hukashiya, Unya ayuyala lutshukutshuku; Ne dia Latuyalaka Kanga lulimbilimbi ayulela LʼUkungu a Siona ndu la Jerusalema. Ndi ayohetsha lutumbu ngaingai la ntundu ka dihangamendi diandi.