Isaya 21 - La Bible en Otetela (Bible K'Ekila) 1991

Enelo lu Dikambu DiʼUsui wa Shenga wʼAshi a Waki

¹ Enelo kʼusui wa shenga wa lʼumamu wʼashi a waki Uku atetaka lopepe la wulu lu leke la Nengebe, Osoku mbatutumbaka lukumu uma lʼusui wa shenga, Uma lu wudja wukawo woma.

² Enelo ka mamba kambenama le mi. Ukesanyi atukesanaka, la ulanyishi atulanyaka. Elame li, uneli! Mediya li, utadingi! Dimi layukumiya tukuku tshe takawatungi.

³ Okone utema ami ambulula la okei. Lunyangu lambumunda, uku atutataka umuntu lono. Dimi laya khunya, lokonyo lambumbula atui. Lambudidima, lukumba lambula ashu.

⁴ Lambate sulu, woma ambundjidimia. Hyutshihutshi yakamangenangenaka, yaya woma le mi.

⁵ Vo wambula mesa, wambukitsha ulami, wole, wono. Nyuneli, nyu ewandji, nyukiti engawu iso!

⁶ Okone mbambumvutela Khumadiondjo ati: Uneli, ukitsha ulami. Ndi kataki akambu wayundenaka.

⁷ Lamʼenandi ambahemi, ambahemi wa falasa ahendi ahendi, Ambahemi wa punda, ndu ambahemi wa kamelo, Ndi alungi, ahukami ololo.

⁸ Ndi akaleli uku tambwe ati: Khumadiondjo li, dimi latemalaka lʼetangelu yanyi tshe, Ndu latutshikalaka lu dihuli diami diʼulimu utshu tshe.

⁹ Kakiane enda, ambahemi wuyayi, ambahemi wa falasa ahendi ahendi! Ku ndi akati ntu ati: Ambuhandjo, yee! Babilona ambuhandjo, La difanelu tshe dia ditemolatemola diawo Diambatshatshema la kete,

¹⁰ Wudja ami li, nyu nyakasuswama uku epunga lu dihuli diami diʼesuswelu. Kene kakamuki uma le Latuyalaka Kanga lulimbilimbi, Unyashungu wa Isariyele, kamumunyutela.

Enelo lu Dikambu Dia Duma

¹¹ Enelo lu dikambu dia Duma. Amotshi watumbetaka uma lu Seire vati: Ulami, unya akona lʼutshu? Ulami, unya akona lʼutshu?

¹² Ku ulami atakaluyaka diui ati: Unya utsha mputo, pindju kuyayi, ndu utshu. Naka nyu nangaka mumbula, nyukaluli, nyuyumumbuli ntu.

Enelo lu Dikambu Dia Arabiya

¹³ Enelo lu dikambu dia Arabiya. Nyu ambetshetshi wa la Dedana, Nyayutulala lu tuhuka ta la Arabiya

¹⁴ Nyu asi wudja wa lema, Nyotolele wane weli la pusa kʼashi ashi; Nyutuhumani la andawi, nyutuwasha ma.

¹⁵ Vo wambulawo tombo, ee tombo tosomwami, Uta wukutwami, la ehenyohenyo wa ta.

¹⁶ Khumadiondjo kata okone ati: Ambutshikala eleku otoi, uku deku diʼusi ulimu, ku lutumbu tshe la Kedara layushila.

¹⁷ Ambuki wʼeta wa dihunga wa wudja wa Kedara wayutshikala paka atoi, ne dia Latuyalaka, Unyashungu wa Isariyele, kambuta osoku.