Isaya 20 - La Bible en Otetela (Bible K'Ekila) 1991

Elembielo kʼAsuriya, Kayundolembia Edjibitu la Etiyopiya, Kambutama Ntundu

¹ Lʼeleku kakatumi Sarangona, khumʼekanga kʼAsuriya, olombodi andi wʼalimbi la ntolosha Ashidode, ndi akatuwalembia.

² Lʼetena kako, Latuyalaka akatela Isaya, onʼa Amoza, ati: Unela, ukululi dikutu, unya sabata uma lʼekulu aye. Ku ndi akatshi osoku, akakendakenda utakataka, la ekulu hwe.

³ Latuyalaka akati ati: Uku akakendakenda ukambi ami Isaya utakataka la ekulu hwe deku satu, dia ndjala djimbitelu la ewelu le Edjibitu la Etiyopiya,

⁴ osoku mhayotola khumʼekanga kʼAsuriya asi Edjibitu la esekwami wa Etiyopiya utsha lu fumbi: elongo la esumbi, etakataka la ekulu hwe, la asoko lʼandja dia mbutsha asi Edjibitu sonyi.

⁵ Wayu-ndama la woma, wayolombo la sonyi, dikambu dia Etiyopiya diakawalungamelaka, la dikambu dia Edjibitu diakawayasemaka.

⁶ Lʼetena keso, antu watudjaseke lʼumamu wʼashi a waki wayuta vati: Nyendi uku ambuyala elungamelu kasu, le waku wakatalawo le wo dia nkimanyiama la ntshungwama le khumʼekanga kʼAsuriya. Keli kakiane, ukundi ayutuhanda na?