Isaya 2 - La Bible en Otetela (Bible K'Ekila) 1991

Diulelu Dia Ki Dia Latuyalaka Dia Wedja Tshe

¹ Enelo kakeyi Isaya, onʼa Amoza, dikambu dia Juda la Jerusalema.

² Lu nshi yayayi, Ukungu wa luudu la Latuyalaka Ayushikikala ladiku diʼekungu. Vo wayediama ladiku dia akuna. Ku wedja tshe wayokelaka utsha leko.

³ Wedja efula wayunelaka, wayutaka vati: Nyuyi tumbeli lu ukungu wa Latuyalaka, Utsha la luudu la Unyashungu a Jakoba. Ndi ayututetsha akambu andi. Ku shu tayokendakendaka lu mbuka kandi, Ne dia olembe ayutumba uma la Siona, La diui dia Latuyalaka uma la Jerusalema.

⁴ Ndi ayuyala umbadi wa wedja, Ayusambula akambu wʼantu wa wedja efula. Vo wayutshula tombo tawo kungu, La akonga awo tukuwa ta loho. Wudja omotshi hawembela wudja ukina tombo, Nduku antu haweka akambu wa ta ntu.

Latuyalaka Ayulumbuya Akanga wʼUtaku

⁵ Wa lu luudu la Jakoba, Nyuyi, tokendekende lu usasi wa Latuyalaka.

⁶ We Latuyalaka akaseke wudja aye, khumbu ka Jakoba, Ne dia vo wakaluli la ditshelu diʼuma le antu wa lu leke lʼehutwelu ka unya. Vo wambuyala wetshi wʼawulu, uku asi Filistiya, Watekesanelaka la ana wʼasi wedja.

⁷ Kete yawo ambulula too la fesa la paunyi. Ekundji awo kema la ekumelu. Kete yeli too la falasa, Ndu pusupusu yawo ya ta yaheyama mbala.

⁸ Wudja awo wambulula too la dikishi. Vo watotemolaka ulimu wʼanya awo, Ee, kene kakawatshi la pita yawo vame.

⁹ Antu wa kolo wayusuwo, Ku antu a waki wayukitshakitshama. Okone tadimanyiaki.

¹⁰ Oto lu dive, utuyashe lu ditshu, Ne dia woma a wuki wa Latuyalaka, La ne dia lutumbu la wuki andi.

¹¹ Untu leli la endelu ka lahi ayuhuluyama, La kanga utaku ayukitshakitshama. Ku Latuyalaka ndame kayediama lu lushi lako.

¹² Latuyalaka Kanga lulimbilimbi eko la lushi, Lukundukitshakitsha akanga wʼutaku, Lukundukitshakitsha akanga wa lukanyi la ndjambiya;

¹³ Etamba tshe wʼetali wa la Lebanona watusimboka hwa-hwa, La etamba tshe wa la Bashana,

¹⁴ Ekungu tshe la akuna tshe wʼetali;

¹⁵ Tangelu tshe diʼetali, la ngeli tshe ya waki;

¹⁶ Mashua wʼashi tshe wa la Tarashishi, La kene tshe katongenyangenyaka ashu.

¹⁷ Kanga utaku la kanga lahi wayukitshakitshama. Ku Latuyalaka ndame kayediama lu lushi lako.

¹⁸ Dikishi tshe diayulanyema.

¹⁹ Lamʼayunela Latuyalaka dia ndjidimia kete, Antu wayutushama lu weuku wʼave, Ndu lu minga ya la kete, Ne dia woma andi, ndu ne dia lutumbu la wulu andi.

²⁰ Lu lushi lako, antu wayosa dikishi diawo dia fesa ndu dikishi diawo dia paunyi, Diakawasele dia vo ntemolaka; Wayutadikadjedi dji la tufukifuki.

²¹ Ku lamʼayunela Latuyalaka dia ndjidimia kete, Vo wayoto lu weuku wʼave ndu lʼasa ave, Ne dia woma wa Latuyalaka, Ndu ne dia lutumbu la wulu andi.

²² Nyukimo mbekama le untu, Latutundjaka etenyi ka lumu lʼehembe andi, Na engo kendi na?