Isaya 18 - La Bible en Otetela (Bible K'Ekila) 1991

Etelu kʼAkambu Wahatayi lu Dikambu Dia Etiyopiya

¹ Yee! kete yukema luhelu lʼahafu wa difumbofumbo, Yeko la wedi wʼekedi wa Etiyopiya,

² Yo yatutumaka atumami lu Nile, Lu watu wa tusadisadi ladiku diʼashi! Nyutshu, nyu akendji wʼesadi, Utsha lu wudja wʼantu wʼalundoki la amena, Utsha lu wudja wakawukaka woma uma kʼetatelu, Wudja a wulu watohotshahotshaka antu tshe, Wudja wa kete yakahimbuhimbuyama lʼekedi.

³ Nyu wa lʼandja tshe, watudjaseka la kete, Nyendi lamʼahanewo ekuhu a koi lʼekungu! Lamʼadawo pungi, kanyulungi!

⁴ Latuyalaka akamvutela ati: Dimi layendaka ki uma lu edjaselu kami, Uku luhaladi la yanyi, Uku dingi dia dihohe lu nshi ya dinela.

⁵ Keli la ntundu ka dinela, lamʼatololoka alembo, Ndu lamʼatutumbaka elua wʼapepe, Ndi ayuhimbula songusongu la lukuwa, Ayuhimbula alambu wʼetali.

⁶ Ekodi ako tshe wayukimwama Le fudu ya lʼekungu la le nyama ya la kete. Ku fudu yayahemaka ladiku diawo lu nshi yʼowo, Ku nyama tshe yayetamaka loko lu nshi ya diye.

⁷ Lʼetena keso, ushasha ayukimwama le Latuyalaka Kanga lulimbilimbi, uma le wudja wʼantu walundoki la amena, uma le wudja wakawukaka woma umakʼetatelu, wudja a wulu watohotshahotshaka antu tshe, wudja wa kete yakahimbuhimbuyama lʼekedi. Ushasha ako ayembama utsha lu dihuli dieli lukumbu la Latuyalaka Kanga lulimbilimbi, lʼukungu wa Siona.