Isaya 16 - La Bible en Otetela (Bible K'Ekila) 1991

¹ Nyutumeli umbuledi wa wudja osongo wʼekoko. Nyetumi uma la Sela, uma lʼusui wa shenga, Utsha lʼukungu wʼona umuntu a Siona.

² Uku fudu va tekeko, uku kefu yambuhandjwama, Mbayuyala ana amantu wa la Moaba lu etehwelu ka Aranona.

³ Ulaki alaku, usambuli aha la shonodi; Utshi dedi diaye unya lʼatei ote uku lʼutshu; Ushe wane wayatshanyema, tufungaki one layalawo!

⁴ Etawo asikami wa la Moaba mbidjase la ye. Uyali eshamelu kawo uma lʼelundji kʼundjakanyi; Wengiya utsha nshila, elanyelu kutsha nkume, La wane watohotshahotshaka antu lʼekulu wutsha nshila la kete.

⁵ Kiti ka diulelu kayushikikala lu ngandji ka shikaa. Omotshi ayudjase loko la kolamelu lu luudu la dipema la Davidi. Ndi ayusambula, ayuyangaka akambu wʼusimbwi, Ayusamanyaka lu akambu wʼololo.

⁶ Shu takuki lukumu la utaku efula wa Moaba, Djawudi yandi, la osemo andi ndu kele kandi. Keli ufunu andi ambuyala anyanya.

⁷ Okone asi Moaba waleli, Vo tshe wayulela Moaba. Nyuleli, nyuyakomole wulu, Ne dia elanyelu kʼekati wa tomwemwe tambuma ta la Kire-Haresete.

⁸ Diango dia lʼesui wa la Heshibona diambolengela. Khumi ya wedja wambuhimbula tahi yuleki dimena yʼokodi wa Shibima. Vo wakakumi pulu la Jazera, wakalambi lʼusi wa shenga, Songusongu yawo yakalambi, yakatenyanya pulu ndu la wedi wʼuduwa.

⁹ Okone mbayumulela kame la delu dia Jazera, Ne dia okodi wa Shibima. Heshibona la Eleale, dimi layunyoloya lʼasoi ami, Lu elua aye ndu lu dinela diaye.

¹⁰ Ongenongeno wambunyema, ndu ongenongeno a wuki wambumo lu dikambo. Hawuyimba esambu lu dikambo diʼelua, kuyanga mbola sali leko. Amamudi hawamula ashi, la wanu lu mbaka yawo. Lakashimbi waelu awo wʼongenongeno.

¹¹ Ndu diui diami diambusakana uku losese lu dikambu dia Moaba, Ndu esohi ami lu dikambu dia Kire-Herese.

¹² Lamʼatuyaenyaka Moaba, lamʼatunduyahenyahenyaka lu dihuli dia ladiku, lamʼatunduyakaka lʼetemwelo dia ndjolomba, ndi hatukundjaka nduku engo.

¹³ Oso eli diui dia Latuyalaka diakandateketa lu dikambu dia Moaba umaka etena keso,

¹⁴ Keli kakiane Latuyalaka amboteketa ati: Lu deku satu, uku deku dia ufutami, lutumbu la Moaba layonywama, kame la ului uku a wuki tshe. Atshikadi wayuyala atoi ndu wodu.