Isaya 13 - La Bible en Otetela (Bible K'Ekila) 1991

Enelo lu Dikambu Dia Babilona

¹ Enelo kakenyi Isaya, onʼa Amoza lu dikambu dia Babilona.

² Nyuhane ekuhu ka koi ladiku diʼukungu wʼutali, Nyedia diui wulu utsha le antu, Nyetshetsha anya dia vo mboto lu asuku wʼantu a waki.

³ Dimi lakandjangela akilami ami, Laketi ahuka ami ne dia kele kami, Ee, waku watuyasemaka ne dia wuki ami.

⁴ Nyuki lundju! diku diʼekungu, Uku lundju lʼelui a waki wʼantu! Lufungusu la mamba la waulelu wa wedja womotshi kame! Latuyalaka Kanga lulimbilimbi omotsha ului wʼalimbi dia ndo ta.

⁵ Vo wambuya uma lu kete yʼetali, Uma la kuma kʼulungu. Latuyalaka la diango dia ta dia kele kandi Wutsha nanya kete tshe.

⁶ Nyudi tukuku ne dia lushi la Latuyalaka laya suki. Lo layuya uku elanyelu uma le Kanga-Wulu-Tshe!

⁷ Okone anya tshe wayokomo, La utema wʼuntu tshe ayuyala ashi atu.

⁸ Vo wayuka woma; Okei la lunyangu wayuwanda. Vo wayena pa uku atutataka umuntu lono; Wayendana la utewalu. Dundji diawo diayukaso uku lumbi la dja.

⁹ Lushi la Latuyalaka lambukuka, Lushi la ngala, lushi la kele ndu lʼududu a wulu! Dia nanya kete la nshila antu wa kolo ushiki,

¹⁰ Ne dia toto ta lʼulungu la elui ato hawoheta ntu; Unya ayuyala udjima lʼehutwelu kawo, La ngondo hukashiya ntu.

¹¹ Dimi layusuya andja ne dia kolo kawo, La antu wa kolo ne dia ehedia awo. Dimi layunya utaku wʼakanga a lahi, Layukitshakitsha djawudi yʼakanga a ngala.

¹² Dimi layete antu atoi, wayuyala wulu menama uleki paunyi ka lutshula, Ee, antu wayuleka paunyi ka Ofira wulu ntanema.

¹³ Okone layudidimia ulungu. Kete ayusutshasutshama ladiku dia ekitshelu kayo, Uma lu kele ka Latuyalaka Kanga lulimbilimbi Lu lushi lʼududu andi wa mamba.

¹⁴ Uku peli katawatshi Kana uku ekoko waha lʼulami, Osoku mbayukalula untu tshe utsha lu wudja andi, Ndu mbayulawo untu tshe utsha lu kete yawo.

¹⁵ Wane tshe wayuwutana, wayutundwama, Waku tshe wayuwunda, wayudiakema la yombo.

¹⁶ Anʼawo wa tshitshe wayutshatshema lu ashu awo. Vo wayulanya mvudu yawo, wayahotola wadiewo la khudu.

¹⁷ Enda, dimi layatomboshiya asi Mediya, Wane wahatuyangaka fesa, La wahatukumbulaka paunyi dia ndo la wo.

¹⁸ Vo wayudiaka elongo wʼapami la eta awo. Vo hawuka elua wʼuma lʼetema ketshi, La ashu awo hawuhandja ana.

¹⁹ Okone Babilona, lutumbu la waulelu, Elengalenga ka ndjasema kʼasi Kaladiya ayulanyema, Uku akalanya Unyashungu Sodoma la Ngomora.

²⁰ Usumba ako hawulala untu pundju; Nduku untu ayudjase loko lu lolonga la lolonga. Usi Arabiya hakaki luudu landi la dipema leko, Ndu elami wʼekoko hawuladiaki dungalunga diawo leko.

²¹ Keli nyama ya ngala ya lʼusui yayetamaka loko. Mvudu yʼusumba ako yayulula la diango dia woma. Kumbaka yayulalaka, ndu waowo wayulimbolimboka leko.

²² Mbulu yayawana lu mvudu yawo ya waki, Ndu ndjudi lu mvudu yaki khumi ya dikanga. Etena kawo aya suki, Ndu nshi yawo hayuyuyala efula ntu.