Isaya 11 - La Bible en Otetela (Bible K'Ekila) 1991

Diulelu DiʼOlolo Dia Lukuno la Jese

¹ Dimonga diayomonga uma lʼehekeli ka Jese, Ndu lukuno, layutumba uma lʼediu andi.

² Nyuma ka Latuyalaka kayuyala le ndi, Nyuma ka yimba ndu ka ewu, Nyuma kʼelakanyelu ndu ka wulu, Nyuma ka yimoa ndu ka woma wa Latuyalaka.

³ Ndi ayongenangenaka lu woma wa Latuyalaka. Ndi hulumbuya uku atundenaka; Ndi husambula uku atundukaka.

⁴ Keli ndi ayulumbuya asi wula la sambu kʼololo, Ayusambula akanga a memakana wa la kete aha la shonodi. Ndi ayokomola kete la diui diandi uku ohehela. Ndi avudiaka antu wa kolo la luwi lʼuma lʼunyo andi.

⁵ Sambu kʼololo ayuyala uya lu lukindi landi, La kolamelu uya wa dikundju diandi.

⁶ La undu ayudjase kame la onʼokoko. Koi la ona mbudi waycama kame. Osongo wa ngombe, tambwe, la elungalunga ka wata wayuyala kame, Ku kiendakenda ayuyilombola.

⁷ Ngombe la koi wayole kame, Ndu anʼayo wayetama dihuli diame. Tambwe ayole nengese uku gombe.

⁸ Ona laloma ayokenya lasuki la ushu wa tshula. Ona lambukila awele ayudja lunya landi lu difuku dia dikhuha.

⁹ Vo hawuhumuya kuyanga nanya Ukungu ami wʼekila tshe, Ne dia kete ayulula ia ewu ka Latuyalaka, Uku atululaka ashi a waki.

¹⁰ Lu lushi loso, lukuno la Jese layemala uku ekuhu ka koi ne dia wedja. Wedja wayukadimo utsha le ndi; dihuli diʼedjaselu kandi diayutumbwama.

¹¹ Lushi lako, Khumadiondjo ayusimbula lunya landi etena ka hendi dia nshimbela atshikadi wa lu wudja andi wakadiangana lu Asuriya, ndu lʼEdjibitu, la Patorose ndu la Etiyopiya, la Elame, la Shinare ndu la Hamata, ndu lu asenga wa lu ashi a waki.

¹² Ndi ayuhane djimbitelu ya wedja; Ndi ayusanganya asi Isariyele wakatshanyema. Ndi ayomotsha asi Juda wakadianganyema Uma lu kuma nyei ya kete.

¹³ Kandjema ka Efarayima ayumo; La waku watohenyahenyaka Juda, wayulanyema. Efarayima buka Juda kandjema, La Juda hohenyahenya Efarayima.

¹⁴ Keli vo wayufumbo utsha lʼedjelu ka unya Dia ntahema lu aheka wʼasi Filistiya. Vo wayohotola diango diʼantu wa lu leke lʼehutwelu. Vo wayusimbula anya awo utsha lʼEdome la Moaba; Asi Amona wayakitanyia.

¹⁵ Latuyalaka ayulanya lulimi lʼuduwa wa lʼEdjibitu. La lopepe lʼowo mbayundetshetsha lunya landi ladiku dia Ndjali. Ndi ayukiatanya ekedi esambeli, Ku antu wayukitenyanya lu kete yʼufumbu la sabata.

¹⁶ Osese a wuki wayuyala uma lu kete yʼAsuriya, Ne dia atshikadi wa wudja andi mbeta loko, Uku akayala osese ne dia Isariyele Lushi lakawatumbi uma lʼEdjibitu.