Isaya 10 - La Bible en Otetela (Bible K'Ekila) 1991

¹ Mananu kayali le waku watudjangaka adjangu wa kolo, Ndu le afundji watufundaka akambu wahasimbwi,

² Dia nyima uhumbi sambu kʼololo, La dia mpotola asi wula wa lu wudja ami ndjadjasela kawo, Dia wadi waki edu ndjala diango diawo dia lohotola, Dia vo mbete ana wa ditshiki diango dia dimbu!

³ Kayunyutsha lu lushi lʼelumbwelu, Lamʼayuya elanyelu le nyu uma lʼetali? Le na ayunyulawo dia nkundja ekimanyelu, Ndu lendi ayunyutatshiki lutumbu lanyu?

⁴ Vo wayukutakuta lʼului wʼasi lukanu, Wayoko lʼului a waku wambudiakema. Kuyanga osoku, kele kandi hakitakita, Ndu lunya landi lakasimbemadi.

Latuyalaka Ambukamba Ulimu lʼAsi Asuriya

⁵ Asuriya eli ohehela wa kele kami. Ududu ami eli ukalimba lu lunya landi.

⁶ Dimi layutuma dia ntolosha wudja wʼakanga a dionyo. Dimi layuwudjangela dia ndi ntsho le wudja wukami kele, Dia ntohotola la mumba diango diawo, La mbahotshahotsha lʼekulu awo uku loteke la lʼesese.

⁷ Keli khumʼekanga kʼAsuriya hakani osoku, Ndu oso kema tukanyi tʼutema andi. Keli ndi la esangweyu ka nanya, La ka nshila weija efula ushiki;

⁸ Ne dia ndi atutaka ati: Ana ami waha khumi ya dikanga tshu uka?

⁹ Kalano, aha uku Karakemishe? Hamata, aha uku Arapada? La Samariya, aha uku Damaseke uka?

¹⁰ Uku akamakumia lunya lami lu waulelu wa dikishi, Lene aki dikishi dia losela ndeka dia Jerusalema ndu dia la Samariya.

¹¹ Uku akamatshela Samariya la dikishi diawo, Halutshela Jerusalema la dikishi diawo osoku uka?

¹² Okone lamʼayushidiya Khumadiondjo ulimu andi tshe lʼUkungu a Siona ndu la Jerusalema, ndi ayusuya khumʼekanga kʼAsuriya, ne dia djawudi la utaku andi.

¹³ Ndi akati ati: Dimi lakatshi akambu ane uma lu wulu wa lunya lami, Ndu uma lu yimba yami, ne dia dimi leli kanga ewu. Dimi lakasekola elelu wa wedja, Lakahotola ekundji awo. Uku dihuka dia wulu mbakamalembia wane wakadjase lu kiti ya waulelu.

¹⁴ Lunya lami lakashula ekundji wa wedja efula. Uku atuwudulaka ekeli wutshiki fudu, Mbakamasanganya wa la kete tshe. Ku nduku lakahuhanya dihafu, Kuyanga mbasula elomo, kana mbawana.

¹⁵ Undi, kenge yayutakula ladiku dia one lakota la yo, Kana nso ndjatumbula uleki one lahimbula la to? Uku ukuki ohehela nkimela one latuwediaka, Kana uku ukuki ukalimba munyia one laha utamba!

¹⁶ Okone Khumadiondjo, Latuyalaka Kanga lulimbilimbi, Ayondja asikandi weli la alimba a waki. La tshina dia lutumbu landi, dja yayoheta, yayutuwo lumbi.

¹⁷ Usasi wa Isariyele wayuyala dja, La lʼEkila landi lumbi. Lo layutshumba ndu layumana atende andi La akumbu andi lu lushi otoi.

¹⁸ Latuyalaka ayutshumba lutumbu lʼukunda awo, Ndu la dikambo diawo diʼeteto: utema la dimba. Etena keso kayuyala uku atukitakitaka wulu wa kanga hemo.

¹⁹ Etamba wutshikadi lʼekunda awo, wayuyala etamba wa mbala, Kuyanga dikenda mbeyaka nfunda efula kawo.

²⁰ Lu lushi lako, atshikadi wa Isariyele ndu wane wakahandi, wa lu luudu la Jakoba, wayukimo mbekama le one lakasuyaka. Keli wayekama lu mete le Latuyalaka, lʼEkila lʼlsariyele.

²¹ Atshikadi wayukalula, ee atshikadi wa Jakoba le Unyashungu a wulu.

²² Kuyanga wudja aye, we Latuyalaka, weli efula uku losenga la lʼumamu wʼashi a waki, paka djui yʼatshikadi tshu mbayukalula. Elanyelu kuludi too la sambu kʼololo kambudjangema.

²³ Ne dia Khumadiondjo, Latuyalaka Kanga lulimbilimbi, ayushidiya kene kakandasanguya lu kete tshe.

²⁴ Okone Khumadiondjo, Latuyalaka Kanga lulimbilimbi kata ati: Wudja ami wudjashi lu Siona, tanyukaki asi Asuriya woma, kuyanga vo wambunyokomola ohehela, ndu wambedia ukalimba awo ladiku dianyu uku akatshaka asi Edjibitu.

²⁵ Yema tshitshe tshu mbambutshikala ku ududu ami ayushila, ku kele kami kayukadimo utsha le wo dia mbalanya.

²⁶ Latuyalaka Kanga lulimbilimbi ayahashahasha lʼohehela uku akadiakema asi Midiyana lu dive diʼOreba. Ndi ayedia ohehela andi ladiku dia ashi a waki uku akandatshi lu Edjibitu.

²⁷ Lu lushi lako, wutshu wa khumʼekanga kʼAsuriya wayumo uma lʼaheka anyu, la lokoho landi layukamo uma lu kingu yanyu. Ndi ambunela uma la Rimona.

²⁸ Ndi ambukuma la Aiyate, ambutenanya Mingirona, Ambutshika eshiko andi la Mikimashe.

²⁹ Vo wambeta lʼasa minga, wambutulala la Ngeba. Rama ambudidima, Ngibeya ka Saulu ambulawo.

³⁰ Uhangohango la diui dia wulu, we ona umuntu a Ngalima! Laisha li, uhukami! Anatota li, ukaluya diui!

³¹ Madimena ambekeko, Asi Ngebime wambulawo dia ntana eku.

³² Elo kene, ndi ambemala la Nobo. Ndi ambunyinginya lunya lu manela Ukungu wʼona umuntu a Siona, Dikuna dia Jerusalema.

³³ Enda, Khumadiondjo, Latuyalaka Kanga lulimbilimbi, Ayokola tahi la ngala. Wane wuleki waki wayokotama, Wane wuleki etali wayukitshakitshama.

³⁴ Ndi ayotetshatetsha akanda wa lʼukunda la kenge, Ndu Lebanona ayokotama kame la etamba awo a wakiwaki.