Isaya 1 - La Bible en Otetela (Bible K'Ekila) 1991

Wudja wa Kolo

¹ Enelo ka Isaya, onʼa Amoza, kakandenyi dikambu dia Juda la Jerusa-lema lu nshi ya Uziya, Jotama, Ahaza la Hezekiya khumi ya dikanga ya Juda.

² Ulungu li, uki! we kete, uhuke tui! Ne dia Latuyalaka kata ati: Dimi lakalesbaka ana, ndu lakawaudiaka, Keli vo wakantombokwela.

³ Ngombe atulimbitelaka khumeto, Ndu punda elelu ka khumeto. Keli Isariyele haweyi nduku yema, Wudja ami hawukani yimba.

⁴ Yee, wudja a kolo, antu wuludi too la wutshu wa kolo, Diuhu diʼatshi wa kolo, ana watutshaka akambu wa sonyi li! Vo wakaseke Latuyalaka, wakonyola lʼEkila lʼIsariyele; Wakamo uma le mi, wakakaluya ekongokongo.

⁵ Okoko wana wukukinyu nsuyama ntu, Dia nyu nkolamela ntombokwelami? Ote tshe waya kandji ketu, Ndu utema tshe wambokomo.

⁶ Umakʼesi a dikhka pulu ndu lʼote, kema ki, Paka puta, sudu la wimbo, Yo yatakono, yatombama ahondo kuyanga nkitama iso.

⁷ Wudja anyu wambuhandjwama, Esumba anyu wambutshumbama. Asi wedja wambole diango dia lu kete yanyu lu ashu anyu. Kete yambulanyema, asendji wambuyilembia.

⁸ Ona umuntu a Siona ambutshikala Uku lusamvu lʼekambo kʼelua, Uku etumbu lʼekambo ka sele, Uku usumba wambudingama le atunyi.

⁹ Utunduyala Latuyalaka Kanga lulimbilimbi, Kuntutshikela djui yʼatshikadi, Tshiki shu tutuyala uku Sodoma, Tutufana la Ngomora.

Etunelu ka Ditshelu Diakawakadimula

¹⁰ Nyuki diui dia Latuyalaka, Nyu ewandji wa Sodoma. Nyuhuke atui le elembe wa Unyashungu asu, Nyu asi Ngomora.

¹¹ Katshami lʼefula kanyu kʼelambu kene? mbakati Latuyalaka. Dimi lambuheko elambu wa lutshumba a waumi wʼekoko La wata wʼesongo wa ngombe. Dimi hangenangena lu dikila diʼesongo wa ngombe, Kana diʼekoko, kuyanga dia waumi wa mbudi.

¹² Akona akanyudjangela olembe one wa nanya aseke ami Lʼakamelu, lamʼatunyuyakaka la ntundu kami?

¹³ Tanyelaki elambu wʼanyanya ntu; Upumu wʼetshumbelu weli wononyi le mi, Talelu ta ngondo, nshi yʼekila, dietelu dia sanganya. Dimi halangi mena kolo kosohanyimi la sanganya yʼekila.

¹⁴ Utema ami mpetshaka talelu tanyu ta ngondo, La nshi yanyu ya waki yʼongenongeno. Yo yeko wutshu le mi, dimi lambuheko ndjemba.

¹⁵ Lamʼayunyediaka anya anyu, Dimi layunyaka ashu ami uma le nyu. Lamʼayunyufudiaka alombelo, Dimi haluhukamaka anya anyu weli too la dikila.

¹⁶ Nyuyaotsha, nyuyaedia; Nyunya etsha anyu wa kolo uma lu ashu ami, nyukimo ntsha kolo.

¹⁷ Nyeki dia ntsha ololo; Nyuyangi akambu wʼuluwanyi, nyukimanyia usuyami. Nyusambweli ona etshiki ololo, Nyoteketele wadi aki udu.

¹⁸ Nyuyi kakiane, tukani yimba kame, mbata Latuyalaka. Kuyanga kolo yanyu yeli tilili, Yo yayuyala wema uku pembe. Kuyanga yo yeko belaa, Yo yayuyala diosa.

¹⁹ Naka nyu nyayetawo, ndu nyayukitanyia, Nyu nyayole diango diʼololo aia lu wudja.

²⁰ Keli naka nyu nyayutuna ndu nyayuhedia, Nyu nyayudiakema la yombo, Ne dia unyo wa Latuyalaka mbakati osoku.

Elumbwelu la Etshungwelu ka Jerusalema

²¹ Ndi usumba wa kolamelu, Wambuyala umuntu kanga luseka li! Vo waki too la sambu kʼololo, Akambu wʼololo mbakayalaka loko. Keli kakiane aya adjakanyi atu loko.

²² Fesa kaye kambukadimo akedi, La wanu aye wambosohanyema lʼashi.

²³ Ewandji aye wambuyala akanga wʼehedia, Ndu ambekesanedi wa evi. Vo tshe watulangaka mbu yʼutshu, Watuyangaka diango dia sanbu. Vo hawutusambulaka dikambu dia onʼetshiki ololo, Ndu dia wadi aki udu luyi le wo.

²⁴ Okone Khumadiondjo, Latuyalaka kanga lulimbilimbi, Kanga-Wulu lʼIsariyele, kambuta ati: Kawo, dimi layumo uma lu usanu a wane watumpetshaka, Ku layosomboya atunyi ami.

²⁵ Dimi layukahe lunya lami, Layolelola akedi aye, Layukunyiya tumi ta mbulu tshe.

²⁶ Dimi layukaluya embadi aye uku akiwo nshi ya ntundu, Ndu andaki aye uku akiwo lʼetatelu. Lʼokongo diku we ayetama ati: Usumba wʼololo, ngelu ka kolamelu.

²⁷ Siona ayushimbamela uma lu sambu kʼololo, Ndu wane wambukadimula etema loko, wayushimbamela uma lʼakambu wʼololo.

²⁸ Keli elanyelu kayuyala le akanga wʼehedia, la antu wa kolo kame. Waku watutunaka Latuyalaka wayulanyema.

²⁹ Vo wayutshama sonyi ne dia etamba wakanyalangaka. Ndu nyu nyayovo sonyi ne dia dikambo diakanyasonola;

³⁰ Ne dia nyu nyayuyala uku utamba weli la akatshi wambolengela, Ndu uku ekambo kaha la ashi.

³¹ Kanga wulu ayuyala uku aaiyu wambuma La ulimu andi uku fuki ya dja. Vo ahendi wayulungula kame, Nduku untu layeya mbadima.