Hosea 6 - La Bible en Otetela (Bible K'Ekila) 1991

¹ Nyeso tukaluli le Latuyalaka. Ne dia ndi kakatatshatsha, ndi ayutokonoya; Ndi kakatuhumuya, ndi ayomba puta yasu.

² Lʼokongo a nshi hyendi, ndi ayutokonoya. Ndi ayutunyiya lushi la satu, Ku sha tayuyala la lumu la ntundu kandi.

³ Tulimbiteli Latuyalaka, Tutetemali nyanga mbulimbitela. Eyelu kandi keko shikaa uku ehutwelu ka unya. Ndi ayuya le su uku mvula, Uku mvula yʼadihelu yatutungaka elula lu kete.

⁴ Kayumukutshela we Efarayima? Juda li, kayumukutshela na? Ololo anyu weli uku dingi dia pindju, Uku lopopo latumoka esadi.

⁵ Diako mbakamawatshatsha le amvutshi. Dimi lakadiaki la aui wʼuma lʼunyo ami; Dumbwelu diami diatohetaka uku usasi.

⁶ Ololo mbalangami aha elambu; La ewu ka Unyashungu ndeka elambu wa lutshumba.

⁷ Vo wakalanya sheki yami la Adama. Leko kakawantombokwela.

⁸ Ngiliyade eli usumba wʼatshi wa kolo; Usumba ako wambulula to la dikila.

⁹ Ului wʼelombedi weli uku ului wʼapotodi, Watuhulamaka kame dia ndjaka antu. Vo watudiakaka antu lu mbuka kʼutshu la Shekeme, Ee, vo watutshaka kolo ka wuki.

¹⁰ Dimi lakenyi dikambu dia wononyi lu khumbu ka Isariyele; Efarayima ambotemola ditemolatemola; Isariyele ambuyasuwula.

¹¹ Ndu le ye we Juda, etena ka dinela kambushikikema.