Hosea 4 - La Bible en Otetela (Bible K'Ekila) 1991

Tamu ta Latuyalaka la Isariyele

¹ Nyulungi diui dia Latuyalaka, nyu asi Isariyele! Latuyalaka eko la wane wudjashi lu kete dikambu, Ne dia nduku kolamelu kuyanga ololo, Nduku ewu ka Unyashungu lu kete.

² Paka atshibelu la kashi, diakanelu, Uvi la munanyi atu mbatutumbaka, La dikila ladiku dia dikila.

³ Diako mbayuyala kete la utanda, Mbayukiyana wane tshe wudjashi loko. Nyama ya la kete la fudu ya lʼulungu Ndu nsi ya la ashi a waki wayunyema.

⁴ Keli untu tadjaki tamu, tahangohangoki, Ne dia dikambu ne dieko lʼasami la ye, we olombedi.

⁵ We ayoko la vanyi, umvutshi ayutakana kame la ye lʼutshu. Dimi layudiaka nyo.

⁶ Wudja ami wambulanyema ne dia uhumba wʼewu. Ne dia we akatuni ewu, dimi layukutuna ntu, Ndu layukunya uma lʼulimu ami wʼolombedi. Ne dia we akuhela elembe wa Unyashungu aye, Osoku ndu dimi layuhela anʼaye.

⁷ Uku akawafulanela, mbakawantshaka kolo efula. Dimi layukadimula lutumbu lawo sonyi.

⁸ Vo watolekaka kolo ya wudja ami; Vo ndjalaka la pusa kʼehedia wa wudja

⁹ Uku ayuyala le wudja, mbayuyala le olombedi. Dimi layasuya uku kolo yawo, Layalumbuya uku etsha awo.

¹⁰ Vo wayole, keli hawuluta. Vo wayunana, keli hawutana, Ne dia vo wakantuni, dimi Latuyalaka, la elembe ami.

¹¹ Wanu la ashi lʼelua watunyaka ewu.

¹² Wudja ami watumbulaka utamba awo akambu, Ku etenyi kawo kʼutamba katalimbitshiyaka; Ne dia saki ka ntemola dikishi kambuwanganyia. Vo watotemolaka ditemolatemola, Wambumo etali uma le Unyashungu awo.

¹³ Vo watulambulaka elambu lʼete wʼekungu, Watutshumbaka malashi ladiku diʼakuna, La tshina diʼutamba wʼulungu, diʼusumba la diʼuwamba, Ne dia dedi diawo ndjalaka yoo-yoo. Uma lu dikambu so, mbatunanaka anʼanyu wʼamantu, Ndu mbatuyalaka alokayi anyu la luseka.

¹⁴ Dimi halusuya anʼanyu wʼamantu lamʼunanawo, Kuyanga alokayi anyu lamʼayalawo akanga a munanyi efula, Ne dia apami vame watetolaka le akanga a munanyi, Ndu watulambulaka elambu kame la akanga a luseka. Wudja waha la yimba, watulanyemaka esadi.

¹⁵ Isariyele, kuyanga we atotemolaka ditemolatemola, Juda tayalaki la unungu lu dikambu ne. Tanyutshokaki la Ngilingala. Tanyumbelaki utsha la Bete-Avena, Ndu tanyutshibaki nyati: Uku eli Latuyalaka la lumu!

¹⁶ Isariyele wambushikikala uku ngombe ka wadi kahateke a lokoho. Ku kakiane, Latuyalaka ayalesha Uku onʼa okoko lʼusui a wuki uka?

¹⁷ Efarayima ambumamema dikishi diawo, nyukimo ndame.

¹⁸ Ului wʼambidjoki mbewo, vo watunanaka tena tshe. Vo watulekaka nanga akambu wa sonyi. Uleki lutumbu lawo.

¹⁹ Lopepe layakhundunganya, La vo wayutshama sonyi lu dikambu dia diakelu diawo.