Hosea 2 - La Bible en Otetela (Bible K'Ekila) 1991

Ngandji ka Latuyalaka le Wudja Audi Wakoseke

¹ Nyete onengenyu nyati: Wudja ami; La kadiyenyu nyati: Ndi ambukama ketshi.

² Nyamia nyengenyu, nyuwamia. Ne dia ndi kema wademi, ndu dimi kema umendi. Ndi anya tulimbitelu ta munanyi uma lʼelundji kandi, La ta luseka uma lu tulu kandi.

³ Naka aha osoku dimi layukulula ahondo, Layutshika utakataka uku akanduto; Layuwete uku usui wa shenga, Layukitsha uku kete ya wumuma, Ndu layudiaka la pusa kʼashi.

⁴ Dimi haluka anʼandi ketshi, Ne dia vo weli ana wa kanga luseka.

⁵ Nyengewo akunanaka, one lakawauti akayasuwula. Ndi akati ati: Dimi layuyela eseka ami, Watumbishaka ma diami la ashi ami, Ahondo ami wa diosa diʼekoko, ndu wa linene, iso la dinono.

⁶ Okone dimi lutsha mbudihela mbuka kandi lʼatende, La mpika eheli ka lukumbu laawo, Diaha ndi ntana mbuka yandi ntu.

⁷ Ndi ayuyelana la eseka andi, keli ndi huwanda. Ndi ayayanga, keli ndi huwaena. Lʼokongo diku, ndi ayuta ati: Dimi layukalula, Layutsho le umemi la ntundu, Ne dia etena kakimi la ndi, dimi laki la ongenongeno uleki kakiane.

⁸ Ndi kumbeya ntu ati: Dimi kakawusha epunga, ashi wʼelua la iso. Dimi lakawusha fesa la paunyi efula, Yakawatshaka la yo ulimu wa Bala.

⁹ Diako mbayumuhotola epunga ami lu etena ka dinela La ashi ami wʼelua lu ononyi awo, Mbayumohotola ahondo ami wa diosa diʼekoko ndu wa linene Wahumbandi ndota, dia nkumba utakataka andi.

¹⁰ Kakiane dimi lutsha nkenenadia sonyi kandi Lu ashu wʼeseka andi, Ku nduku layeya mbutshungula uma lʼanya ami.

¹¹ Dimi layukumiya ongenongeno andi tshe, Nshi yandi ya waki, talelu tandi ta ngondo, nshi yandi ya mumuya La nshi yandi ya waki yakawashikike.

¹² Dimi layulanya ekodi indi wa vinyo la etamba andi wa fingu; Wakandataka ati: Vo weli tshindu diakantshinde eseka ami. Dimi layuwaete ukunda, ku nyama ya lʼukunda yayelekaka.

¹³ Dimi layûsuya, ne dia nshi yandi ya waki, Yakandatshumbela WaBala malashi. Yakandayalengaka tungunga tʼatui la adidi andi, Yakandayelaka eseka andi. Ndu yakandambuhelaka, mbata Latuyalaka.

¹⁴ Okone dimi layonga umuntu Isariyele lʼosengosengo Dimi layolombola utsha lʼusui wa shenga, Layutoteketa la ndi aui wa ngandji.

¹⁵ Dimi layutuwusha dikambo diandi dia vinyo leko, Ndu ukidi wa Akora uku suku diʼelungamelu. Ndi ayimba esambu leko Uku akandimbaka lu nshi yandi yʼusekaseka, Uku lushi lakandatumbi uma lu kete ya Edjibitu.

¹⁶ Lushi loso, we ayumbeta wati: Umemi. We humbeta ntu wati: Bala kami, mbata Latuyalaka.

¹⁷ Dimi layunya kumbu ya WaBala uma lʼunyo andi, ne dia ndi atukudimula kumbu yawo ntu.

¹⁸ Lu lushi loso, dimi layudja la nyama ya lʼukunda, fudu ya lʼulungu la diango tua yakutula dia la kete sheki dikambu diaye. Dimi layokola eta la yombo, layunya ta uma lu kete, layuwetamia la lutui tshitshi.

¹⁹ Dimi layuyala umendi pundju. Dimi layuyala umendi lʼakambu wʼololo, lʼakambu wʼusimbwi, lu ngandji ka shikaa, ndu lu ketshi.

²⁰ Dimi layuyala umendi lʼakambu wa kolamelu ku ndi ayunimbitela, dimi Latuyalaka.

²¹ Lʼetena keso kata Latuyalaka ati: Dimi layuwukela, layukela ulungu, Ku vo wayukela kete.

²² Ku kete yayukela epunga, Ashi wʼelua la iso, ku vo wayukela Jezerele.

²³ Dim layufudia one lakamune la kete, Layuka one laki kumbukama ketshi ketshi. Ndu dimi layeta one laha wudja ami nti: Wudja ami, Ku vo wayuta vati: We keli Unyashungu asu.