Hosea 12 - La Bible en Otetela (Bible K'Ekila) 1991

Ambuhangwela Efarayima ne Dia Kashi Kawo la Wengiya Awo

¹ Efarayima watolekaka lopepe, Watuyelaka lopepe lʼuma lʼehutwelu ka unya. Vo watufudiaka kashi lu akambu wa ngala la lushi la lushi; Wambudja lʼasi Asuriya sheki; Wambotola iso utsha lʼEdjibitu.

² Latuyalaka ambandula Juda. Ndi ayusuya Jakoba uku eli etsha andi, Ayufuta uku ditshelu diandi.

³ Ndi akakimela etshindji ka onangu lʼutema a nyengewo; La lu nshi yandi ya utshingudi, ndi akalo la Unyashungu.

⁴ Ndi akalo la andjelo wa Unyashungu, akuleki wulu. Ndi akaleli, akolombe otshoko lʼosengosengo. Jakoba akahumana la Unyashungu la Betele, Ku ndi akateketa la ndi leko.

⁵ Ndi eli Latuyalaka, Unyashungu, Kanga lulimbilimbi; Latuyalaka keli lukumbu landi.

⁶ Keli we ukaluii le Unyashungu aye; Ukimeli ngandji la sambu kʼololo wulu, Ukungelaki Unyashungu aye nshi tshe.

⁷ Efarayima eli usi ukanda, Latukimelaka kilo ya lukesu lu anya andi. Ndi atongenangenaka nkesa antu.

⁸ Efarayima akati ati: Mete, dimi laya kanga ongonyi, Lambuhumo lukulu lʼolo. Keli ekundji andi tshe haweyi mbedima la nnungu wa kolo yandi.

⁹ Keli dimi leli Latuyalaka, Unyashungu aye, Umaka kete ya Edjibitu. Dimi layunyudjasha ntu lu mvudu yʼapema, Uku lu nshi ya waki vakawashikike.

¹⁰ Dimi kateketaka lʼamvutshi; Dimi lakafudiaka waenelo, La uma le amvutshi ako mbakamukaka wela.

¹¹ Naka kolo keko la Ngiliyade, mete, vo wayulanyema. Naka vo watulambulaka esongo wa ngombe la Ngilingala, Ndu diakelu diawo diayuyala Uku atuta wʼave lʼeshidi wʼemunda lu dikamto.

¹² (Jakoba akalawo utsha lu kete ya Arama, Isariyele akakambaka ulimu dia nkundja wadi. Lu dikambu dia wadi, mbakandalamaka ekoko.)

¹³ Uma le umvutshi, mbakatundja Latuyalaka Isariyele uma lʼEdjibitu; La uma le umvutshi, mbakandalamaka Isariyele.

¹⁴ Efarayima akanyangia Latuyalaka utamanya. Latuyalaka landi ayukaluya unungu wa dikila Diakandatshulula lʼote andi, Ayukaluya sonyi kandi lʼote andi.