Hosea 11 - La Bible en Otetela (Bible K'Ekila) 1991

Unvashungu Ambuka Wudja Andi Wakoseke Ketshi ka Mamba

¹ Lamʼaki Isariyele olongo a pami, Dimi lakawukaka ngandji. Dimi laketi onʼami a pami uma lu Edjibitu.

² Lamʼakamatetemala mbaeta, Vo wakaleki mangana uma le mi. Vo wakatetemala nambula WaBala elambu, La ntshumbela dikishi malashi.

³ Dimi laketshaka Efarayima lokendo, Latukimela lu anya. Vo kumbeya vati: Dimi Kakakonoya.

⁴ Dimi lakakutula la eshinga wa ketshi, La ekodi wa ngandji. Dimi lakayala le wo uku one latunyaka kobo lu kingu yawo. Dimi lakawasheka diango dia nde.

⁵ Vo hawukalula lu kete ya Edjibitu, Keli usi Asuriya ayuyala khumʼekanga kawo, Ne dia vo wakatuni nkalula le mi.

⁶ Yombo yayoto lu esumba awo, Yayulanya tukengeti ta asuku awo; Yakashila ushiki ne dia sangweyu diawo.

⁷ Wudja ami watukikitshaka utema dia mangana uma le mi; Watuwaetaka uya le KhumʼUlungu, Keli nduku otoi lʼatei awo atutumbulaka.

⁸ Ukundi eyami nkukadja, we Efarayima? Ukundi eyami nkukimo, we Isariyele? Ukundi eyami nkete uku Adem? Ukundi eyami nkutshela uku Zeboyima? Utema ami ambulungula; Ketshi kami kambuyala otekoya.

⁹ Dimi halutsha uku kele kami ka wulu. Dimi handjulanya Efarayima ntu, Ne dia dimi keli Unyashungu, aha untu. Dimi keli lʼEkila lʼatei anyu, Dimi haluya dia ndjunyulanya.

¹⁰ Vo wayuyela Latuyalaka layudikita uku tambwe. Lamʼayundudikita, ana wʼapami wayuya Uma lʼedjelu ka unya wayadidima.

¹¹ Vo wayukhunguso uku fudu uma lʼEdjibitu, Uku inga uma lu kete yʼAsuriya. Dimi layakaluya lu mvudu yawo, mbata Latuyalaka.

¹² Efarayima atunyingaka la kashi, Ku khumbu ka Isariyele la lukesu. Keli Juda ambeyama le Unyashungu; Ndi eko la kolamelu lʼEkila.