Hosea 1 - La Bible en Otetela (Bible K'Ekila) 1991

Wadi a Hosea, Umuntu Kanga Luseka la AnʼAndi

¹ Diui ma Latuyalaka aiakayi le Hosea, onʼa Beri, lu nshi ya Uziya, Jotama, Ahaza la Hezekiya, khumi ya dikanga ya Juda ndu lu nshi ya Jerobaoma, onʼa Joashi khumʼekanga Isariyele.

² Etena ka ntundu kakateketa Latuyalaka le Hosea, Latuyalaka akatela Hosea ati: Tshoka, ututshuki umuntu kanga luseka, kuti la kanga luseka ana, ne dia wudja one watekamaka ditemolatemola, wambumo uma le mi, dimi Latuyalaka.

³ Okone ndi akatshu, akatutshuka Ngomere, onʼa Dibalayima. Ndi akatshu diemi, akuti la ndi ona pami.

⁴ Ku Latuyalaka akawutela ati: Uwole lukumbu wati: Jezerele; ne dia paka yema tshitshe mbambutshikala, dia dimi nsomboya khumbu ka Jehu dikila dia Jezerele. Dimi layukumiya diulelu dia khumbu ka Isariyele.

⁵ Lushi lako, dimi layokola uta wa Isariyele lʼukidi wa Jezerele.

⁶ Umuntu ako akatshu diemi ntu, akuti ona umuntu. Ku Latuyalaka akatela Hosea ati: Uwole lukumbu wati: Lahukama ketshi; ne dia dimi handjuka khumbu ka Isariyele ketshi ntu, kuyanga mbadimanyia kolo nduku yema.

⁷ Keli dimi layuka khumbu ka Juda ketshi. Dimi layashimbela la wulu ami, dimi Latuyalaka, Unyashungu awo. Dimi ha-luwashimbela la uta, yombo, ata, falasa, kuyanga la ambahemi wa falasa.

⁸ Lamʼakandakidia Lahukama ketshi awele, ndi akatshu diemi ntu, akuti ona pami.

⁹ Ku Latuyalaka akatela Hosea ati: Uwole lukumbu wati: Kema wudja ami; ne dia nyu kema wudja ami, ndu dimi kema Unyashungu anyu.

¹⁰ Keli asi Isariyele wayuyala efula uku seke ya losenga la lʼumamu wʼashi a waki, yaheyama mbedikama kuyanga mbalema. Lu dihuli diakswawataka vati: Nyu kema wudia ami, wayuwataka vati: Ana wa Lʼnyashungu a lumu.

¹¹ Asi Juda la asi Isariyele wayusangana kame Vo wayuyasonwela uwandji otoi. Vo wayutumba uma lu kete, ne dia lushi la Jezerele, layuyala lushi la wuki.