Heberu 9 - La Bible en Otetela (Bible K'Ekila) 1991

¹ Sheki ya ntundu yaki la adjangu dia otemwelo la etemwelo ka la kete.

² Ne dia wakalongosola luudu la dipema lu dihuli dia ntundu, ekitshelu ka tala, la mesa, la ma diʼEyalelu. Dihuli diako diambetama ati: Dihuli diʼEkila.

³ Lʼokongo a dihondo diʼekumbamelu dia hendi, luudu la dipema leko letawo vati: Ekila ka Dikila.

⁴ Donga dia paunyi dia ntshumba malashi dieko loko, ndu oshete wa sheki wukumbami la paunyi ladiku tshe, aki la puki ka paunyi kaki lu mana loko, ndu danga dia Arona diakamene songusongu, ndu pasi diʼave dia sheki;

⁵ ladiku diawo kaki okeruba wa lutumbu wukumbi edie ka ketshi Shu hateyi nyutela dia akambu ane otoi otoi kakiane.

⁶ Ku lamʼukalongoswama diango so osoku, elombedi watotoka lu luudu lu dipema lu ntundu, watutshaka elimu awo.

⁷ Keli lu luudu la dipema la hendi, tshikima olombedi a ladiku katotoka woto otoi lu eleku la dikila, diakandakimo dia kolo yandi, ndu dikambu dia kolo yʼantu.

⁸ Nyuma kʼOlolo ambutenya dikambu so ati: Mbuka kʼutsha lʼetemwelo kutenuma lamʼakemadi luudu lu dipema la ntundu

⁹ (lako leli djimbitelu yʼetena kene). Watukimoka eshasha la elambu waheyi lama mbete khumʼutema kʼotemodi ololo tshe, uku yediko yʼelongoswelo kene.

¹⁰ Keli elembe wa dimba tu mbewo ndu mbu ya nde lu dinono ndu wehu efula wu diokelo diʼashi, wukadjama edja ndu lamʼakakuki etena kʼelongoswelo.

Keli Kristu Akalungwela Antu Etshungwelu ka Pundju

¹¹ Keli lamʼakene Kristu uku olombedi u ladiku a diango diʼololo diayayi, ndi aketi lu luudu la dipema luleki wuki lu uluwanyi (laki kumpikama lʼanya wʼantu, dia mvuta osoku ati: Aha ka etungelu kene).

¹² Ndi komboto la dikila dia mbudi la dia esongo wa ngombe, keli la dikila diandi ndame. Ndi akoto etena otoi lu Dihuli diʼEkila, lamʼakandalungwela antu etshungwelu ka pundju.

¹³ Ne dia naka dikila dia mbudi la dia waumi wa ngombe, la utuku wʼosongo a ngombe mbeyaka nkidia la mbedia antu uma lu kolo yawo lamʼamongawodiango diako, lʼalimba awo,

¹⁴ undi dikila dia Kristu, aha la diwadi le Unyashungu lu wulu a Nyuma ka pundju, hadiuleki mbedia khumʼetema yanyu uma lu etsha wa nyoi, dia nyu nkambela Unyashungu a lumu ulimu uka?

Kristu Akatukanya la Sheki yʼUyuyu

¹⁵ Dia dikambu so, mbukutukanya Kristu la sheki yʼuyuyu. Ndi akavu ne dia nyimanyia antu kolo yaki lu sheki ya ntundu, ne dia wane kukundeti walunguli daka dia ukito a pundju.

¹⁶ Ne dia lene ambuyala daka, dieli la nyoi ka one lakadikimo ndjala shikaa,

¹⁷ ne dia daka ndjalaka la wulu lamʼayuvo Dio kema lu wulu lameki kangadio lu lumu.

¹⁸ Okone ndu sheki ya ntundu kunkidiama aha la dikila.

¹⁹ Ne dia amʼakatela Mose antu adjangu tshe uku aki elembe, ndi akose dikila dia esongo wa ngombe la dia mbudi, ndu ashi la diosa dia tilili la lushindja, akamonge buku ndu ului wantu tshe;

²⁰ akati ati: Dikila ne dieko dia sheki yakanyudjangela Unyashungu.

²¹ Ntu, ndi akamonge luudu la dipema la alonga tshe wakawatshaka ulimu la dikila pupu.

²² Uku wata elembe, mbatami nti: Diango tshe diambediama la dikila, lamaha ekwelo ka dikila, keti edimanyelu ka kolo kema laawo.

“Dia Minya Akambu wa Kolo Mbakandayakimo”

²³ Okone diaki la wo dia mbedia difanelu dia diango dia lʼulungu la elambu ene. Keli diango dia lʼulungu diame diakediama la elambu wuleki ene ololo.

²⁴ Ne dia Kristu komboto lu etemwelo kakatshama lʼanya wʼantu, efanelu ka mete mete, keli ndi akoto lʼulungu, ne dia menama lu ashu a Unyashungu dia dikambu diasu.

²⁵ Aha dia ndi ndjakimo ekimo efula, uku atotoka olombedi a ladiku lu Dihuli diʼEkila lu eleku la dikila diaha diandi.

²⁶ Naka osoku, diaki la ndi dia nsuwa tena efula uma lʼetatelu kʼandja. Keli ndi akenama etena otoi ketu lʼekumelu ka etena kene, ne dia minya akambu wa kolo mbakandayakimo.

²⁷ Uku dieli la antu dia mvo luvo otoi, ku elumbwelu ndjuya lʼokongo,

²⁸ okone ndu Kristu akakimoma etena otoi dia memba kolo yʼantu efula. Ndi ayene etena ka hendi, etali la kolo, le wane watukungelaka dia vo ndjala la panda.