Heberu 8 - La Bible en Otetela (Bible K'Ekila) 1991

Akambu wa Sheki ya Ntundu Kumbeya Nduwanya Atemodi

¹ Lu akambu wambututaka, dikambu dia wuki dieko okone: Shu teko la olombedi ladiku a wuhu oso, lakakjase lu lunya la pami la kiti ka diulelu ka Khumadiondjo lʼulungu,

² ukambi wa lu etemwelo ndu lu luudu la dipema la mete, lakahiki Khumadiondjo, aha untu.

³ Ne dia olombedi a ladiku tshe ambosonama dia nkimo eshasha la elambu, okone dieli la olombedi ako dia ndjala la engo ka nkimo.

⁴ Utunduyala ndi aki la kete, tshiki ndi kundjala uku olombedi, ne dia akina weko watukimoka eshasha uku wata elembe.

⁵ Vo watukambelaka esangwelu la didjidji dia diango dia lʼulungu ulimu, uku akewula Unyashungu Mose lamʼakandayangi mpika etumbu; akawutela ati: Enda, utshi diango tshe uku yediko yakamakenya lʼukungu.

⁶ Keli kakiane Kristu ambuyala la ekambelu kuleki ololo, uku umbidji a sheki yuleki ololo mbendi, yakadjama lu alaka wuleki ololo.

⁷ Utunduyala sheki yako ya ntundu yaki ololo tshe, tshiki vo kumbidja sheki ya hendi.

Sheki yʼUyuyu

⁸ Ne dia ndi akatani la munga lamʼakandati ati: Nyulungi, nshi yayuyala, mbata Khumadiondjo, Yayumudja sheki yʼuyuyu la khumbu kʼasi Isariyele Ndu la khumbu kʼasi Juda.

⁹ Aha uku sheki yakamadji la watshewo Lu lushi lakamakimela lu lunya, Dia mbalombola uma lu kete ya Edjibitu; Ne dia vo kuntetemala lu sheki yami, Dimi kumbaenda, mbata Khumadiondjo.

¹⁰ Khumadiondjo akati ati: Sheki nye mbayumudja la khumbu kʼasi Isariyele Lamʼayeta nshi sho; Dimi layudja elembe ami lu tukanyi tawo, Layefunda lʼetema awo, Ku dimi layuyala Unyashungu awo, Vo wayuyala wudja ami.

¹¹ Vo hawuyetshanya untu la unyandi, untu la unyandi; La untu la onangu, untu la onangu, ati: Eyi Khumadiondjo; Ne dia vo tshe wayumbeya, Uma le luleki tshitshe edja ndu le luleki wuki lʼatei awo.

¹² Ne dia dimi layuwauka ketshi lu kolo yawo, Dimi haluho munga yawo ntu.

¹³ Lamʼakandati dia sheki yʼuyuyu, okone ndi ambete sheki ya ntundu lʼokongo. Keli engo kaya edja, kaya umusu, kambuyanga nshisho pundju.