Heberu 6 - La Bible en Otetela (Bible K'Ekila) 1991

Tutetemali lu Ditshelu DiʼEtshundju wʼAntu

¹ Okone tutshiki dietshelu dia ntunduntundu dia Kristu, tutetemali lu ditshetu diʼetshundju wʼantu. Tatuhikaki tshina diʼekadimwelu kʼetema kʼuma lu etsha wa nyoi ntu, ndu dia mbetawo kʼutsha le Unyashungu,

² kame la wetshelu wa batiza, la ahelu kʼanya, ndu la eulwelu kʼuma lu nyoi, ndu la elumbwelu ka pundju.

³ Shu tayutsha osoku, naka Unyashungu ayetawo.

⁴ Ne dia waku wakenyi yanyi ya Unyashungu etena kekina, la wakalungula ushasha uma lʼulungu, la wakayala amboshi wa Nyuma kʼOlolo,

⁵ la wakunganela diui diʼololo dia Unyashungu, la wulu wʼetena kayayi,

⁶ ku lʼokongo diku wakanganela, ku heyana dia mbakaluya ntu lʼekadimwelu kʼtema ne dia vo wambudiaka Onʼa Unyashungu ntu, wambuwutsha sonyi lu seke.

⁷ Ne dia kete yatomenaka mvula yatolokaka tena efula loko, la yatutumbiaka mbu ya nde yʼololo le wane wayombela, yo yatulungulaka otshoko uma le Unyashungu.

⁸ Keli naka yo yayutumbia atende la ahangulakoi, yo yayutunama, yayuyala lasuki la mbidjama mananu. Ekumelu kayo eli dia ntshumbama.

Nyutetemali, Tanyuyalaki Tusuasua

⁹ Elangimi, tambulungamela akambu wuleki ololo le nyu, akambu wambuyelana la panda, kuyanga mbatasu osoku.

¹⁰ Ne dia Unyashungu kema kolo, dia ndi mbuhela ulimu anyu la ngandji kakanyenya antu lu lukamba landi, uku akanyakimanyia ekilami, ndu uku atshanyu edja ndu elo.

¹¹ Shu nangaka nyu tshe untu lʼuntu ntetemala dia ndjala la ukalanganu one lu akambu tshe wʼelungamelu edja ndu lʼekumelu,

¹² diaha nyu ndjala tasuasua. Keli nyukuya wane wambukita alaka ne dia mbetawo la etetemala kawo.

Etshibelu ka Unyashungu Kahakadimo: “Elungamelu Kaka wa tukitshiya”

¹³ Ne dia lamʼakalaki Unyashungu Abarahama daka, ne dia ndi kumbeya ntshiba ukina luleki wuki, ku ndi akayatshibela ndame,

¹⁴ ati: Mete, dimi layakotskokola, ndu layukufadia.

¹⁵ Okone Abarahama akayala la memakana, akalungula daka diako.

¹⁶ Antu watutshibaka luleki wuki uleki ndjatshiba vame, lu tamu tawo tshe, etskibelu keli diui dia nshidiya dikambu.

¹⁷ Okone lamʼakalangi menya ekito wa daka ati: Diui diami hadiukadimo, ndi akahanya etshibelu ladiku,

¹⁸ ne dia akambu ako ahendi kawukadimo, la Unyashungu heyi mvuta kashi lu akambu ako. Shu la dikambu dieya ntukikitsha, shu ane wakalawo dia nungula elungamelu kakawatukitshiya.

¹⁹ Elungamelu kako keko uku lungu la mashua lʼutema, keli la mete la eteti, ka mboto lʼatei a dikondo diʼekambamdla.

²⁰ Lu dihuli diako, mbakatotwela Jesu uku utatedi lamʼakanda yala olombedi a ladiku uku Melekizedeke pundju.