Heberu 5 - La Bible en Otetela (Bible K'Ekila) 1991

Ulimu wʼOlombedi a Ladiku

¹ Ne dia olombedi a ladiku tshe lambosonwama uma lʼatei wʼantu, ambosonwama dikambu dia antu lu akambu wa Unyashungu, dia ndi nkimo eshasha la elamba wu nyimanyia kolo.

² Ndi mbeyaka ndjala la memakana le akanga a dinginya la le amunganedi, ne diu ndame keli lʼatei wʼubanga a weodu.

³ Dia dikambu ne, dieli la ndi dia nambula ulumba dia kolo yandi uku alambulandi dia kolo yʼantu.

⁴ Nduku untu uyuyaosela kenemo kene tshikima Unyashunga kuwetshi, uku aki Arona.

Kristu Keli Olombedi Asu a Ladiku

⁵ Osoku ndu Kristu kanajutambula ne dia ndjalu olombedi a ladiba, keli one lukatumbula bukawatela ati: We eko Onʼami, Elo bakatshimi;

⁶ Uku atandi lu dihali dikina ati: We keli olombedi pandju, Uku Melebizedeke.

⁷ La nshi yakindi lu dimba, Jesa akatemolaka la akasengasengaka one laki lu wala a mbushimbela uma lu nyoi la dela dia wala la asoi lu ushu ku ndi akawakela ne dia woma wakandukaka Unyashunga.

⁸ Kuyanga ndi aki Ona, ndi akeki ndjala la ukitanyia la akamba wakandasuwaka.

⁹ Lamʼakandaluwanyema ololo tshe, ndi akayala atungi a panda ka pundju le wane tshe watukitanyiaka.

¹⁰ Ndi aketama le Unyashunga ati: Olombedi a ladiku aka Melekizedeke.

Awele ne Dia Ana wʼAshashi; Mbu ya Nde ya Wulu ne Dia Dikumanyi

¹¹ Sha la akambu efula wa mvuta dikambu diandi, weli wulu a nyukadimwela, ne dia nya nyambuyala puki.

¹² Kuyanga etena kambeta ka nyu ndjala embetsha, nyu nyambuhumba ukina nyetsha akambu wʼetatelu kʼaui wa Unyashungu ntu, ndu nyambuyala uku wane wahumba awele, aha mbu ya nde ya wulu.

¹³ Ne dia untu tshe laloma awele, atekelaka diui dia akambu wʼololo; ne dia ndi eki ona ashashi.

¹⁴ Keli mbu ya nde ya wulu ndjalaka ne dia etshundju wʼantu, wane wambekela, la wambuyala la tumba ta ntshikitanya ololo la kolo.