Heberu 4 - La Bible en Otetela (Bible K'Ekila) 1991

Embetawudi Etu Mbayoto lu Mumuya Kakandalaki

¹ Okone, lamʼeki daka dia mboto lu mumuya kandi, tuki woma, ne dio omotshi anyu atukuheko mboto loko.

² Mete, wakatusambisha lukumu lʼololo uku vo, keli diui diakawuki kundjala waho le wo, ne dia dio kundjala kame la mbetawo le wane wakadiuki.

³ Ne dia shu wane wakayetawo, mbamboto lu mumuya kako, uku akandati ati: Uku akamatshibi la kele nti: Vo hawoto lu mumuya kami, kuyanga elimu andi wakashidiama umaka etungelu ka kete.

⁴ Ne dia ndi akati lu dihuli dikina dikambu dia lushi lʼesambeli okone ati: Unyashungu akumuya lushi lʼesambeli uma lu elimu andi tshe;

⁵ la lu dihuli diako ntu ati: Vo hawoto lu mumuya kami.

⁶ Okone, ne dia dihuli diambutshikala dia amotshi mboto loko, ku waku wakawasambisha lukumu lʼololo ntundu komboto loko ne dia uhedia,

⁷ ndi akasonola lushi lomotshi ntu, ati: Elo, uku akati Davidi lamʼaketi etenyi kʼutali, uku akawati ntundu vati: Elo, naka nyayuka diui diandi, Tanyukikitshaki etema anyu!

⁸ Utunduyala Jashua akawasha mumaya, tshiki Unyashungu kumbatela dia lushi lukina lʼokongo diku.

⁹ Okone mumuya ka lushi lʼekila kambutshikala le antu wa Unyashungu.

¹⁰ Ne dia one lotwe lu mumuya kandi, ambumuya uma lu elimu andi, uku akumuya Unyashungu uma lu elimu andi.

Diui Dia Unyashungu Dieko la Wulu Ndu la Diesa

¹¹ Okone tutetemali dia shu mboto lu mumuya kako, untu takokaki uku djimbitelu ku yʼuhedia.

¹² Ne dia diui dia Unyashungu dieko la lumu, la wangasanu, la diesa diuleki yombo ya pemo wedi ehendi, dio diatutundulaka edja ndu diambatanya utema la nyuma, ndu asonga la ehihu. Dio mbeyaka nimbitela tukanyi la saki ya utema.

¹³ Nduku engo kakatungama, kahenama lu ashu andi. Keli diango tshe dieko etakataka ndu diatenamaka hwe la ntundu ka ashu wa one lahumbasu.

Jesu, Olombedi a Wuki a Ladiku

¹⁴ Okone, ne dia shu teko la olombedi a wuki a ladiku laketi lʼatei wʼulungu, Jesu, Onʼa Unyashungu, tutetemali nkimela mbetawo kasu.

¹⁵ Ne dia shu kema la olombedi a ladiku laheyi ntuka ketshilu weodu asu, keli shu la olombedi a ladiku lakahimbama lu wehu tshe uku shu, keli kuntsha kolo.

¹⁶ Okone tusukani la dihunga lu kiti ka diulelu ka ngandji ka mamba, ne dia shu mbukama ketshi, la dia shu mena ngandji ka mamba ka ntukimanyia lʼetena la uhumba.