Heberu 3 - La Bible en Otetela (Bible K'Ekila) 1991

Jesu Ndeka Mose

¹ Okone, anyasu ekilami, waketama la su lu leta la lʼulungu, nyukani dia utumami, olombedi a ladiku ako lakatetawo, Jesu ndame.

² Ndi aki la kolamelu le one lakosonola, uku aki Mose lu luudu tshe la Unyashungu.

³ Ne dia Jesu akakuki dia ndjala la lutumbu la wuki uleki Mose, uku eli umbiki a luudu la nemo uleki luudu.

⁴ (Ne dia mvudu tshe yatuhikamaka le antu, keli umbiki a diango tshe eh Unyashungu.)

⁵ Mete, Mose aki la kolamelu lu luudu la Unyashungu tshe uku ukambi; ndi aki omenyi wʼakambu wakahumbi mvutama.

⁶ Keli Kristu aki ladiku dia luudu la Unyashungu uku ona. Shu teli uku luudu landi, naka shu tayushikikala lu dihunga diasu, lu lutumbu ndu lu elungamelu kasu edja ndu lʼekumelu.

“Naka Nyambuka Diui Diandi Elo, Tanyukikitshaki Etema”

⁷ Dia dikambu ne, mbakatutela Nyuma kʼOlolo ati: Elo, naka nyayuka diui diandi,

⁸ Tanyukikitshaki etemo anyu, Uku lu nshi yʼuhedio, Uku lu lushi lʼehimba lʼusui,

⁹ Lene akampimbi wotshenyu, Lamʼokowenyi etsha ami deku akumi anei.

¹⁰ Uma lu dikambu so, mbakamdutsha wa lolonga lako kele; Mbakamati nti: Vo watunganelaka nshi tshe lʼetemo awo; Vo howeyi mbuka yomi.

¹¹ Okone mbakamatshibi la kele nti: Vo hawotoki lu mumuya kami.

¹² Anyasu, nyewo, untu omotshi lʼatei anyu atukuyala la utema wo kolo waho lo mbetawo, la ntombokwela Unyashungu a lumu.

¹³ Keli nyulakanaki la lushi lo lushi, uku lushi letawo vati: Elo, ne dio otoi anyu atukukikitshama la lukesu lu akambu wo kolo.

¹⁴ Ne dia shu tambuyala embekesanedi wo Kristu, naka toyutetemala nkimela elungomelu kasu wulu edja ndu lʼekumelu,

¹⁵ lamʼakawati vati: Elo, naka nyayuka diui diandi, Tanyukikitshaki etemo anyu, uku lu nshi yʼuhedia

¹⁶ Wa na wakahedia lamʼakawuki? Aha waku tshe wakatumbi lo Mose uma lʼEdjibitu uka?

¹⁷ Wa na wakawutsha kele deku akumi anei? Aha waku wokatshaka akambu wa kolo, wakako olimbo owo lʼusui uka?

¹⁸ Wa na wakandatshibelo ati: Nyu hanyoto lu mumuya kami, aho pako waku woki la uhedio?

¹⁹ Shu tambena shati: Vo kumbeya mboto, ne dia uhedia owo.