Heberu 12 - La Bible en Otetela (Bible K'Ekila) 1991

Jesu Eko Utatedi la Unduwanyishi a Mbetawo Kasu

¹ Okone ne dia shu tambudingama la ului a wuki wʼemenyi, osoku ndu shu tunya wetshu tshe, la akambu wa kolo watutudingamaka lamʼesu weodu, tusaki esakelu kasu ka luwangu keli la ntundu lʼeteti.

² Tendaki Jesu, utatedi la unduwanyi wa mbetawo kasu, one lakashikikala lʼasui wa utamba a mpeketanya ne dia ongenongeno wakakitshama la ntundu kandi. Ndi akonyola sonyi kawo, akatudjase lu lunya la pami la kiti ka diulelu ka Unyashungu.

Mbekiyama le Shesu lʼUlungu Ayutotwela Elua wʼOlolo

³ Nyukaneli one lakayashikike lʼatei wʼamonyodi wa kolo lu dikambu diandi, dia nyu nyutukokomo, nyutukuheko lʼetema anyu.

⁴ Nyu nyatayashikike edja ndu dikila lamʼakanyalo la akambu wa kolo ta.

⁵ Nyu nyambuhela daku diakawanyulaki uku le ana wa luta? — nti: Onʼami, tonyolaki ekiyelu ka Khumadiondjo, Kana mpeko lamʼayundukulaka.

⁶ Khumadiondjo atekiyaka one lalangandi, Ndu atokomolaka ona tshe letawondi.

⁷ Nyu nyathshikikalaka ne dia mbekiyama; Unyashungu atunyutshelaka uku anʼandi wa luta. Ona akona lahekiyama le shi?

⁸ Keli naka nyu nyaha la ekiyamelu keli le antu tshe, keti ana wʼuma lu luseka mbenyu, aha ana wa luta.

⁹ Dikambu dikina ntu, shu taki la washesu ne dia ntekiya, shu atakalemiaka. Osoku haleki ololo efula dia shu odjala lʼokongo a Shi etema asu, dia shu ndjala la lumu uka?

¹⁰ Vo wakatekiyaka oshi motshi uku aki ololo lu ashu awo. Keli ndi ambutekia lu ololo asu, dia shu odjala elungudi wʼakambu andi wʼekila.

¹¹ Ekiyamelu tshe hafani lʼongenongeno lamʼekito, keli to keko la fono. Ku lʼokongo diku, to katotwelaka wane wambekiyama la to elua wa ki, weli elua wʼakambu wʼololo.

Tanyuyalaki Uku Esau

¹² Okone nyusimbuli anya womonyami, ndu adui wa dikhusi.

¹³ Nyolongoswele ekulu anyu mbuka yʼusimbwi, ne dia untu latenguna tetoyamaki uma lu mbuka, keli ndi akono.

¹⁴ Nyuyelaki akambu wa ki la antu tshe, ndu ekidiamelu keli untu laha la to, henyi Khumadiondjo.

¹⁵ Nyendaki ololo, ne dia untu atukunga ngandji ka mamba ka Unyashungu; udiu a lutunu atukutumba lʼatei anyu dia nyohenyahenya, ndu dia nanya antu efula.

¹⁶ Untu tayalaki umunanyi, kana untu a kolo, uku Esau, ako lakasundja ukito andi la yema ya mbu ya nde.

¹⁷ Ne dia nyu mbeyaka nyati: Lamʼakandalangi nkita ntshoko lʼokongo diku, ndi akatunama, ne dia ndi komena dihuli dia nkadimula utema, kuyanga ndi akayangi wulu la asoi lu ashu.

Akambu wa Diese wa Usika Kristu, la Akambu Weli la Ndi Dia Ntsha

¹⁸ Ne dia nyu kunsukana la kene kakanyeyi munanda, dja yakahetaka, kaki tshududu, la udjima, la ngimbi,

¹⁹ la diui dia pungi, la aui wa wulu. Lamʼkawuki gui aso, vo wakasengasenga Uyashungu vati: Tututelaki diui dikina ntu.

²⁰ Ne dia vo kumbeya mbetawo olembe ati: Naka oyama kemotshi kayunanaa ukungu ako, to kayukama ave.

²¹ Enelo keso kakaleki mbutsha antu woma, okone Mose akati ati: Dimi lambutamanya mbuka woma la lukumba.

²² Keli nyu nyambuya lu Ukungu wa Siona, lu ogelu ka Unyashungu a lumu, la Jerusalema ya lʼulungu, la le elui wa andjelo waheyama mbalema,

²³ ndu lu lusanganya lʼekelizia wa ana wa nundu wambufundama kumbu yawo lʼulungu, le Unyashungu Unumbushi wʼantu tshe, le nyuma ya antu wʼololo wambuluwanyema,

²⁴ ndu le Jesu oteketedi a sheki yʼuyuyu, lu dikila diamongawo mbatutela akambu wuleki wa Abele ololo.

Diulelu Diaheyi Nsutshasutshama

²⁵ Nyendi, tanyutunaki one lanyutela akambu ako. Naka vo kumpanda lamʼakawatuni one lakawaewula la kete, dikambu diuleki diayutushimba mpanda naka tayonyola one latewula uma lʼulungu.

²⁶ Lushi lako diui diandi diakasutshasutsha kete. Keli kakiane ndi ambutulaka ati: Etena kekina ntu layumusutshasutsha kete, aha kete tshu, keli ndu ulungu.

²⁷ La diui ne ati: Etena kekina ntu, diambutenya ati: Diango diakasutshasutshama diayunyema, uku diango diakatungama, ne dia diango diahasutshasutshama diatshikali,

²⁸ ne dia shu tambulungula diulelu diaheyi nsutshasutshama. Tuyali la ngandji ka mamba, totemole Unyashungu la mbongenyangenya la kenemo la woma,

²⁹ ne dia Unyashungu asu eko dja yaheta.