Heberu 10 - La Bible en Otetela (Bible K'Ekila) 1991

Dikila Dia Nyama Kumbeya Minyia Antu Kolo

¹ Ne dia elembe waki didjidji tu dia akambu wʼololo wayayi, waha efanelu mete mete ka diango so, haweyi nduwanya waku watusukanaka la elambu watuwulambulaka lʼeleku lʼeleku.

² Naka osoku kema mete, tshiki vo kunkimo mbalambula uka? Utunduyala atemodi wakediama etena etoi, tshiki vo tawaki la wutshu wo kolo ntu.

³ Keli lu elambu ako, kaki euhwelu kʼakambu wo kolo lu eleku lʼeleku.

⁴ Ne dia dinila dia waumi a ngombe la dia mbudi hadieyi minyia antu kolo.

Lu Ndjakimo Uku Ulambu, Mbakandaluwanya Wane Wakakidiama

⁵ Okone lamʼakayi Kristu la kete, ndi akati ati: We kunonga elambu la eshasha, Keli we akanongoswela dimba.

⁶ We kongenangena lu elambu wo lutshumba, Kana lu elambu wo kolo.

⁷ Ku dimi lakati nti: Enda, dimi lambuyo, Dia ndjutsha lulangu laye, we Unyashungu, Uku akawafundela lu wombo a buku.

⁸ Lamʼakandati ati: We kunanga kuyanga ngenangena lu nyama yʼelambu, elambu, elambu wo lutshumba la elambu wa kolo (elambu wakawalambula uku wata elembe),

⁹ ku ndi akati ati: Enda, dimi lambuya dia ndjutsha lulangu laye. Ndi akanya dikambu dio ntundu, ne dia ndi nshikikadia dikambu dia hendi.

¹⁰ Shu takakidiama lu lulangu landi, ne dia Jesu Kristu akakimo dimba uku ulambu etena etei.

¹¹ La olombedi tshe latemalaka la lushi la lushi atsha ulimu andi, atukimona ulambu pupu, waheyi minyo nelo.

¹² Keli Kristu, lamʼakandayakimo etena otoi uku ulambu wa kolo, ndi okatudjase lu lunya la pami la Unyashungu.

¹³ Ndi akakungi edja ndu atunyi andi wakavala kihuna kʼekulu andi.

¹⁴ Ne dia ndjakimo kandi uku ulambu mbakaedaluwanya wane wakakidiama.

¹⁵ Ndu Nyuma kʼOlole ambutenya dinambu ne; ne dia lʼokongo, ndi akati ati:

¹⁶ Sheki nye mbayumudja la wo Lʼonongo a nshi sho, mbata Khumadiondjo: Dimi layudja elembe ami lʼetema awo, Layefunda ndu lu yimba yawo. Ku ndi akati ati:

¹⁷ Dimi haluho kolo yawo nkuyanga uhedia awo ntu.

¹⁸ Lamʼeli edimanyelu kʼakambu ane, kema dikambu dia nkimo ulambu wo kolo ntu.

Tusukani la Etema a Mete

¹⁹ Okone anyasu, ne dia shu la dihunga dia mboto lu etemwelo ne dia dikila dia Jesu,

²⁰ lu mbuka kakandatukiela, mbuka kʼuyuyu ka lumu, uma lu dihondo diʼekumbamelu, diatasu shati: Dimbo diandi,

²¹ shu teko la olombedi a ladiku a lu luudu la Unyashungu.

²² Okone tusukani lʼetema a mete wuludi la mbetawo, la etema asu wolongoswami uma lu khumʼetema ya kolo, la alimba asu wotshami lʼashi a pudipudi.

²³ Tutetemali lu mbetawo kʼelungamelu kasu, to katukengama, ne dia one lakalaki daka ne eli la kolamelu.

²⁴ Tukananeli untu lʼuntu dia ntomboshanya lu ngandji la lu elimu wʼololo.

²⁵ Tatukimoki nsangana kame, uku eli etshelu kʼamotshi, keli tukikitshanyaki. Tuleki ntsha okone, ne dia nyambena nyati: Lushi lako laya suki.

Kema Ulambu Ukina Weya Nyimanya Kolo ya Untu Latetemala Ntsha Akambu wa Kolo

²⁶ Naka shu tayutetemala ntsha kolo lamʼeyasu mete, kema ulambu ukina weya nyimanya kolo yako,

²⁷ keli paka elungamelu ka woma wʼelumbwelu kayayi, la fono ka wulu ka dja yayutshumba atunyi.

²⁸ Untu lakonyola elembe wa Mose akavu, aha la ketshi, lu diui dia emenyi ehendi kana esatu.

²⁹ Ukundi akananyu diʼasui wa one lambukamela Onʼa Unyashungu la tshina diʼekulu andi, la ambete dikila dia sheki yako yakandakidiama ati: Anyanya, la ambonyola Nyuma ka ngandji ka mamba, ayuleka tena ngana lu anyelu kandi?

³⁰ Ne dia shu mbeyaka one lakati ati: Somboya eko dikambu diami, dimi layafuta Ntu ati: Khumadiondjo ayulumbuya antu andi

³¹ Dikambu dia mbuka woma mbedio, dia nko lanya wa Unyashungu a lumu.

Nyuho Ushikikalu Anyu a Ntundu

³² Keli nyuho nshi ya ntundu, lamʼakayi yanyi ya Unyashungu le nyu, uku akanyashikikala lʼatei wʼasui efula.

³³ Lu leke lomotshi, nyu nyakayala uku engo ka menda wendenda uma lu tengo la asui anyu. Lu leke lukina, nyu nyakayala la akina wakasuwi wuhu ako.

³⁴ Ne dia nyu nyakuki asi lukanu ketshi, lamʼakanyohotola antu diango dianyu, nyaketawo lʼongenongeno, nyakeyi nyati: Teko la diango diuleki ololo, diayushikikala pundju.

³⁵ Okone tanyukimoki elungamelu kanyu, ne dia to keko la difutu dia wuki.

³⁶ Dieli la nyu dia ntetemala, dia nyu ntsha lulangu la Unyashungu, ku nyu nyayulungula daka diakandanyulaki.

³⁷ Ne dia lamʼayeta etenyi ka tshitshe, One laya ka ndja ayuya, hutshimbatshimba.

³⁸ Keli untu ami lʼololo ayuyala la lumu Uma lu mbetawo kanm. Ku naka ndi ayutsho ekongokongo, Ku utema ami hawongenangena

³⁹ Keli shu kema lʼatei a wane watsho ekongokongo edja ndu lʼeshishwelu, keli teko lʼatei a wane weli la mbetawo ka nshimbela nyumu yawo.