Habakuka 3 - La Bible en Otetela (Bible K'Ekila) 1991

Dombelo Dia Habakuka

¹ Elombelo ka umvutshi Habakuka, Kakalongoswama le Shingiyonota.

² Latuyalaka li, dimi lakuki lukumu lʼulimu aye! Diako mbukami woma. Latuyalaka li, ufudia ulimu aye lʼatei wa deku ntu! Lʼatei wa deku, utenyawo ntu. Lʼatei a kele, uho ketshi kaye.

³ Unyashungu akayi uma la Temana. LʼEkila akayi uma lʼUkungu a Parana. Lutumbu landi lakakumbi ulungu. Kete yakaluli la diandu diandi.

⁴ Ngaingai kandi kaki uku usasi. Ndi aki la esasi wakatumbaka uma lu lunya landi, Loko kaki eshamelu ka wulu andi.

⁵ Sui diakayi uma la ntundu kandi, Ku elandu lʼokongo andi.

⁶ Ndi akemala, akedika kete. Ndi akendi, akahandjula wedja vwa. Ekungu wa pundju wakahandjo. Akuna wʼedjedja wakakitakita. Mbuka yandi yaki uku ya lu nshi yʼedjedja.

⁷ Dimi lakenyi mvudu yʼapema ya Kushana lu asui. Ahondo wʼadidishi na lu kete ya Midiyana wakadidima.

⁸ Latuyalaka, we akuki ekedi kele? Undi, kele kaye kaki le ekedi, Kana ududu waki le ashi a waki? Diako mbakayahema ladiku dia falasa yaye, Ladiku dia pusupusu yaye ya panda?

⁹ We akanya dihusu uma lʼuta aye, We akadji akhuwa lu olemo. We akatanya kete la ekedi.

¹⁰ Ekungu wakakenyi, wakuki woma. Pedu kʼashi kaketi. Ohongo wakukia diui diawo, Wakeme anya awo utsha lʼulungu.

¹¹ Unya la ngondo wʼakemala ki lu ahuli awo, Uma lu ngaingai kʼakuwa aye wakatatshokaka; Uma lu engadimwelu ka dikonga diaye diakarangadimoka.

¹² We akatenanya kete lʼududu aye. We akahotshahotsha wedja lu kele kaye.

¹³ We akatumbi ne dia panda ka wudja aye, Ne dia panda kʼukitami aye wʼiso. We akalanya ote wʼuntu a kolo. We akulanya uma lu pelohelo pulu ndu lu kingu.

¹⁴ We akatundula ete wʼandoshi andi wa ta la akonga aye. Vo wakayi uku punganendji dia ndjumpandjula. Ongenongeno awo aki uku dia ndjole usi wula lu usheshe.

¹⁵ We akakendakenda la falasa yaye ladiku dia ashi a waki, Asukhu wʼashi a wulu.

¹⁶ Dimi lakuki diui diako, ku dimba diami diakasaki lukumba. Elomo ami wakadidima. Ehondelo kambuyala lu weka ami, Ekulu ami wusaka lukumba. Ne dia dimi mpumbaka nkunga lushi la sui la ki. Eyelu ka wudja wayayi dia ndjutolosha.

¹⁷ Kuyanga etamba wa fingu hawutundja alembo, Kana elua ndjala lu ekodi wa vinyo, Kuyanga ekambelu ka mbeli huluwana, Dikambo hadiutundja mbu ya nde ntu; Kuyanga ekoko wayutundjama uma lu lukumbu, La ngombe hayuyala ntu lʼekutu,

¹⁸ Dimi layongenangena le Latuyalaka, Layongenangenaka utamanya le Unyashungu a panda kami.

¹⁹ Latuyalaka, Khumadiondjo, eko wulu ami. Ndi ateteka ekulu ami esadi uku ekulu wa lufumbo. Ndi ayonkendjakendja lu ahuli ami wa ladiku. Le olombodi wʼesambu: kame la dihumahuma dieli la ekodi.