Filipi 4 - La Bible en Otetela (Bible K'Ekila) 1991

¹ Okone, anyami wa ngandji wakumbulami, nyu nyeli ongenongeno ami la dembo diami dia kusu, nyu elangimi ami, nyushikikali le Khumadiondjo.

Alaku Amotshi

² Dimi lambulaka Ewadiya la Sutuke, vo wayali la utema otoi le Khumadiondjo.

³ Dimi lambukosengasenga ndu we, unyami ukambi a mete, dia we nkimanyia amantu ane, ne dia vo wakakambi la mi ulimu a lukumu lʼololo, ndu Kelemete, ndu akina anyami ekambi, weli la kumbu yawo lu buku dia lumu.

Nyongenangenaki, Nyolombaki Unyashungu

⁴ Nyongenangenaki le Khumadiondjo tena tshe. Dimi lambunyutela ntu nti: Nyongenangenaki!

⁵ Memakana kanyu keyami le antu tshe. Khumadiondjo aya suki.

⁶ Tanyuyakananyaki, keli lu akambu tshe, nyuti ehumba anyu le Unyashungu lu dombelo la osengosengo kame la eukelu ka lusaka.

⁷ Okone ki ka Unyashungu, kuleki yimba tshe, ayulama etema anyu la tukanyi tanyu le Kristu Jesu.

Akambu Weli Mete

⁸ Anyasu, diui diami dia ndjihelu ne nti: Akambu weli mete, akambu weli la kenemo, akambu wʼusimbwi, akambu weli pudipudi, akambu weli amena, akambu weli la lukumu lʼololo; naka dikambu diʼololo dieko, naka dikambu dia mandula dieko, nyukani dia akambu aso.

⁹ Nyutshaki akambu wakanyeyi la wakanyuki ndu wakanyenyi le mi. Ku Unyashungu a ki ayuyala la nyu.

“Lambekela Ngenangena lu Akambu Tshe”

¹⁰ Dimi lambongenangena efula le Khumadiondjo, ne dia kakiane nyu nyambumbuho ntu. Mete nyakambuho, keli nyakahumbi etena kʼololo.

¹¹ Dimi halati dikambu dia uhumba a diango, ne dia lambekela uku wemi one, ndu dimi ngenangenaka wuhu ako.

¹² Dimi mbeyaka wuhu wa nkitshakitshama, ndu wuhu wa ndjala la efula. Lu wehu tshe ndu lu akambu tshe, dimi lakeki wuhu wa nduta ndu wuhu wa mbuka ndjala: wuhu wa ndjala la efula, ndu ndjala la uhumba.

¹³ Dimi mbeyaka ntsha akambu tshe la wulu wa one latunkikitshaka.

Eshasha wʼAsi Filipi

¹⁴ Keli nyu nyakatshi ololo, ne dia nyakasuwi la mi lu asui ami.

¹⁵ Nyu asi Filipi, nyame mbeyaka nyati: Lʼetatelu ka lukumu lʼololo, lamʼakamunela uma la Makedoniya, nduku ekelizia wakankimanyia lu dikambu dia mbisha la nungula diango, paka nyu nyame.

¹⁶ Ne dia lamʼakimi la Tesalonika, nyu nyakantumelaka etena lʼetena diango diakimi la uhumba.

¹⁷ Dimi hayangi ushasha anyu, keli elua watunyotokaka, mbayangami.

¹⁸ Keli dimi la diango tshe, lambongona. Dimi lambuluta, ne dia lakalungula diango diakanyatumela le Epaforodito, dieli uku upumu wʼololo, uku ulambu wʼololo wa ngenyangenya Unyashungu.

¹⁹ Unyashungu ami ayukutsha ehumba anyu tshe uku eli ongonyi andi lu lutumbu le Kristu Jesu.

²⁰ Kakiane, lutumbu layali le Unyashungu Shesu pundju pundju! Ayali osoku.

Paulu Ambatumela Moyo

²¹ Nyusha ekilami tshe wa lu Kristu Jesu moyo. Anyasu weli la mi wambunyutumela moyo.

²² Ekilami tshe wanyutumela moyo, djekaleka ku wane weli lu luudu la Kayisa.

Diui DiʼEtshokwelo

²³ Ngandji ka mamba ka Khumadiondjo Jesu Kristu kayali lʼetema anyu.